Қазақстанда қаржылық алаяқтыққа қарсы заңнамалық түзетулер күшіне енді. Енді күмәнді аударымдар бойынша бұғатталған қаражатты сот шешімін күтпей-ақ, прокурордың санкциясымен қайтаруға болады, деп хабарлайды 7-su.kz «КТК» арнасына сілтеме жасап.
Бұл өзгерістердің жүзеге асуын Ұлттық банк қадағалайды. Сондай-ақ, Ұлттық антифрод-орталық жанынан бірыңғай база құрылып, онда күмәнді банк карталары мен электронды әмияндар тіркелетін болады.
Жаңа жүйенің арқасында шоттары бұғатталған азаматтар ** шәкіртақы, жәрдемақы, жалақы, зейнетақы секілді әлеуметтік маңызды төлемдеріне кедергісіз қол жеткізе алады**.
Алдағы уақытта қаржылық қауіпсіздікті күшейту үшін жасанды интеллект негізіндегі автоматты бұғаттау жүйесі іске қосылмақ. Бұл технология банктер арасындағы күдікті транзакцияларды да дер кезінде анықтайды.
Сонымен қатар, өз шотын алаяқтарға пайдалануға бергендер – дропперлер қылмыстық жауапкершілікке тартылады.
Ұлттық банктің баспасөз хатшысы Асан Ахметжанның айтуынша, күдікті операцияларды зерттеу уақыты ұзартылды:
– «Қаржы ұйымдары сапалы талдау жүргізуі үшін алаяқтық белгілері бар транзакцияларды бұғаттау мерзімі 3 жұмыс күнінен 5 жұмыс күніне дейін ұзартылды. Антифрод-орталықты дамытудың келесі кезеңі – банк қосымшаларындағы күдікті белсенділікті анықтайтын және банкаралық деңгейде күмәнді аударымды бұғаттайтын жасанды интеллект технологиясын енгізу», – деді ол.
