Қазақстанда бірқатар импорттық тауарларға минималды бағалар деңгейі (МБД) енгізу туралы шешім қабылданды. Бұл туралы Сауда және интеграция министрлігінің баспасөз қызметі хабарлады.
16 маусымда өткен Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссия мына тауарларға МБД қолдану туралы шешім шығарды:
-
азық-түлік өнімдері: ірімшік, сүзбе, картоп, қырыққабат, сәбіз, саңырауқұлақтар, банан, апельсин, мандарин, алма, хурма, көкжидек, күнбағыс дәндері, маргарин, шұжық, макарон өнімдері;
-
өнеркәсіптік тауарлар: минералды және химиялық тыңайтқыштар, еріткіштер мен сұйылтқыштар, антифриздер, шлак мақтасы, минералды силикат мақтасы, отқа төзімді кірпіштер.
Минималды бағалар деңгейі тауарлардың көтерме және бөлшек бағасына әсер етпейді. Ол тек импорт кезінде салықтарды есептеу үшін қолданылады.
МБД – импорт кезінде қосылған құн салығын (ҚҚС) төлеуден жалтаруды болдырмау үшін енгізілген механизм.
Сауда және интеграция министрлігі республикада өндірілмейтін тауарларға МБД есептеудің жаңа формуласын анықтайтын бұйрық жобасын әзірледі.
-
Қазақстанда өндірілетін тауарлар;
-
Қазақстанда өндірілмейтін тауарлар.
МБД мөлшері импорттаушы көрсеткен баға мен отандық өндірушілер бағасының орташа шамасы негізінде есептеледі. Бұл көрсеткіш тек ҚҚС сомасын айқындауға пайдаланылады.
МБД тетігі 2021 жылы қабылданып, 2022 жылғы 1 шілдеден бастап қолданыла бастады. Ол негізінен салық органдарының бастамасымен тауарлардың тым төмен бағамен әкеліну жағдайларын болдырмау үшін енгізілген.
Мысалы:
-
нарықтық құны 500 теңге болған алма 9 теңгеден,
-
нарықтық құны 1200 теңге болған банан 23 теңгеден,
-
нарықтық бағасы 900 теңге болған апельсин 22 теңгеден,
-
шамамен 3500 теңге тұратын шұжық 695 теңгеден импортталған жағдайлар тіркелген.
Бұл – ҚҚС сомасының айтарлықтай азаюына әкеліп, бюджетке түсетін кірістерді төмендеткен.
Министрлік бұл тетікті енгізу арқылы адал бәсекелестікті сақтап, ішкі нарықты қорғауды және салық түсімдерін арттыруды көздеп отыр.
