Қазақстанда туберкулезді анықтау процесі айтарлықтай жеделдетілді. Бұл туралы Денсаулық сақтау министрлігінің штаттан тыс бас фтизиатр-дәрігері, Ұлттық фтизиопульмонология ғылыми орталығының директоры Мәлік Әденов Орталық коммуникациялар қызметінде өткен брифингте мәлімдеді.
Эпидемиологиялық ахуал жақсарды
Мәлік Әденовтың айтуынша, соңғы он жылда туберкулезге қарсы жүргізілген жүйелі шаралардың нәтижесінде елдегі эпидемиологиялық жағдай едәуір тұрақталған. Атап айтқанда:
-
ауру көрсеткіші 43%-ға,
-
таралу деңгейі 52%-ға,
-
балалар арасындағы аурушаңдық 50,3%-ға,
-
ал өлім-жітім 75,6%-ға төмендеген.
«БҰҰ-ның Орнықты даму мақсаттары шеңберінде 2025 жылға дейінгі қойылған міндет – аурудың таралуы мен өлім-жітімді азайту – Қазақстанда 2024 жылдың өзінде-ақ мерзімінен бұрын орындалды», – деді ведомство өкілі.
Диагностикалаудың жаңа деңгейі
Қазіргі уақытта Қазақстанның медициналық-санитарлық алғашқы көмек көрсету мекемелерінде туберкулезді жедел анықтаудың заманауи молекулярлы-генетикалық әдістері енгізілді. Бұл әдіс туберкулезді және оның дәріге төзімділігін бар-жоғы 2 сағат ішінде анықтауға мүмкіндік береді.
Барлық облыстық фтизиопульмонология орталықтары туберкулезді диагностикалаудың халықаралық стандарттарына сай зертханалық әдістермен толық жабдықталған. Сонымен қатар Ұлттық референс зертханаға толық геномды секвенирлеу әдісі енгізілді.
Нақты көрсеткіштер
2025 жылдың алғашқы жартыжылдығында елімізде туберкулез жұқтыруы мүмкін деген 44 941 адам Xpert MTB/Rif әдісімен тексерілген. Оның ішінде 4 230 адамнан (яғни 9,4%) туберкулез анықталды. Бұған қоса 8 633 адам профилактикалық емдеу курсын алған.
