Жасанды интеллект және цифрлық даму министрлігі мен «Транстелеком» АҚ (ТТС) еліміздің автожолдарының бойында тұрақты интернет пен сапалы байланыс орнату туралы маңызды келісімге қол қойды, – деп хабарлайды 7-su.kz ақпараттық порталы.
Бұл жоба «Қолжетімді интернет» ұлттық бағдарламасы аясында жүзеге асырылмақ. Негізгі мақсат – мобильді байланыс мүлдем жоқ немесе желі нашар ұстайтын жол учаскелеріндегі «ақ дақтарды» жою. Енді жүргізушілер мен жолаушылар алыс сапарда навигацияны еркін қолданып, мемлекеттік және банк сервистерін еш кедергісіз пайдалана алады. Ең бастысы, төтенше жағдай кезінде шұғыл қоңырау шалу мүмкіндігі туады.
Жобаны іске асыру екі кезеңге жоспарланған және ол мемлекеттік бюджетке салмақ салмайды. «Транстелеком» АҚ барлық шығындарды өз қаражаты есебінен өтейді.
Мерзімдері мен ауқымы:
-
2026 жылдың соңына дейін – республикалық маңызы бар барлық автомобиль жолдары байланыспен қамтылады.
-
2027 жылдың соңына дейін – облыстық маңызы бар жолдарда жұмыс толық аяқталады.
-
40 мың шақырымнан астам жол қамтылып, 500-ден астам жаңа антенна-мачталық құрылыстар мен базалық станциялар салынады.
Жол бойындағы тұрақты байланыс тек интернетке кіру үшін ғана емес, жол қозғалысы қауіпсіздігін арттыру үшін де маңызды. Бұл жедел қызметтердің оқиға орнына тезірек жетуіне және көлік ағынын интеллектуалды басқару жүйелерін енгізуге жол ашады.
Сонымен қатар, «Транстелеком» салған инфрақұрылымды басқа ұялы байланыс операторлары да пайдалана алады. Бұл дегеніміз – сіз қандай оператордың клиенті болсаңыз да, жол бойында сапалы байланысқа қол жеткізесіз деген сөз.
Бұл бастама Қазақстанның цифрлық транзиттік әлеуетін арттырып қана қоймай, ауыл арасындағы қатынасты жеңілдетеді. Инфрақұрылымның жеке инвестиция есебінен салынуы – мемлекет пен бизнес серіктестігінің оң үлгісі. Тұрақты байланыс жол бойындағы шағын бизнестің (дәмханалар, қонақ үйлер) заманауи төлем жүйелеріне көшуіне де үлкен серпін береді.
