Ақтөбеде 72 жастағы зейнеткер Серік Қожимов өз қаражатына екі гектар жерге 500 түп ағаш отырғызып, шағынаудандар тұрғындарына арналған жаңа саябақ салуды қолға алды.
Бұл туралы 7-su.kz ақпараттық порталы Stan.kz сайтына сілтеме жасап хабарлайды.
«Бос қарап отырғанша, өзімізден кейін бір дүние қалдыруымыз керек қой. Немерелерім қуанады, балаларым қуанады, «Ата отырғызды» дейді. Жақсы ғой. Сая, Мағаджан, Заречный-1 шағынаудандары үшін мәдениет және демалыс саябағын салсақ деп армандаймыз», – деді Ақтөбе қаласының тұрғыны Серік Қожимов.
Уақытылы суарылып, күтім жасалған көшеттердің бәрі дерлік жерсініп кеткен. Зейнеткерге тағы бір ақтөбелік қария – Юрий Михайлович қолғабыс етіп жүр. Серік Қожимов «Халықтық қатысу бюджеті» жобасы аясында билік өкілдері футбол алаңын салып, жолдар төсесе деген тілегін білдірді. Ал мұнда балалар ойын алаңы 2022 жылы бой көтерген.
Фото: Видеодан скрин
«Балалар алаңы 2022 жылы салынды. Ол үшін әкімдікке рақмет. Бірақ ұрлық та, вандализм де болып тұрады. Соған жол бермес үшін өз қаржымызға бейнекамера орнаттық, кейде өзіміз тазалық жұмыстарын жүргіземіз», – Ақтөбе қаласының тұрғыны Серік Қожимов.
Ақтөбедегі «Алматы» ауданының әкімі Рустем Үтешев келер жылы сол аумақта футбол алаңы, баскетбол алаңы және воркаут аймағын салуды жоспарлап отырғанын айтты.
«Кейінірек демеушілердің көмегімен аумақты толықтай абаттандырғымыз келеді. Серік Қожимовқа алғыс білдіреміз. Ол ұйымдастырушылық көрсетіп, халықты жинап, өзі де тазалық жұмыстарына қатысады», – деді Рустем Үтешов.
Фото: Видеодан скрин
Агроном мамандығы бар Серік Қожимов өзінің білім-білігін, тәжірибесін пайдаланып, арманын жүзеге асыруға бел буып отыр. Оның бастамасының арқасында облыс орталығында тағы бір жасыл демалыс орны пайда болмақ.
