Қазақстандықтар соңғы уақытта әлеуметтік желіде азық-түлік бағасының өскенін айтып, шағымдарын білдіруде. Осыған қатысты Сауда және интеграция министрлігі мәлімдеме жасады, – деп хабарлайды 7-su.kz ақпараттық порталы.
Желі қолданушылары қымбатшылық белең алғанын айтып, үкіметтен бағаны реттеуді сұрап жатыр:
«Бағалар расымен сұмдық болып жатыр. 3 кг фаршты 15 000-ға, 5 кг етті 25 000-ға алдым. Жақсы, біреудің шамасы жетер. Бірақ шамасы жетер деп, құтыра беруге де болмайды ғой. Офлайндағы орташа жалақы – 200 000-400 000 теңге. 1 аптаға азық-түлік алу – 50 000-60 000 теңге. Сонда адамдар тек тамақ табуға ғана жұмыс жасай ма?»
«16% ҚҚС-ке, азық-түлік пен дәрінің қымбаттауына қарсымын. Соңғы уақытта интернет әлсіз, қымбатшылық туралы жазатын адамдардың посттары рекке шықпайтынын байқап жатырсыздар ма? Әлде тек қана мен бе? Үкіметке сөзіміз жетуі үшін, қолдап кетейік, ағайын!»
«Соңғы 2 күнде трендтен азық-түліктің қымбаттағаны туралы 50 жазбаны анық оқыдым. 1 апталық азық-түлік ерлі-зайыпты + 1 бала үшін 60 000 теңге шыққан екен, еще ол арзан деп есептелетін. Сонда адамдар айына қанша табуы керек?»
«Азық-түліктің бағасы өсіп кетті. Жалақымыздың 50%-ы кетеді. Қалай өмір сүреміз?» – деп жазды желі қолданушылары.
Алайда Сауда министрлігінің мәліметінше, тамыз айында азық-түлік инфляциясы бар болғаны 0,5% құраған. Бұл көрсеткіш азық-түлікке жатпайтын тауарлар бағасынан екі есе төмен және қызмет көрсету саласындағы өсімнен үш есе аз.
Министрліктің дерегінше, Қазақстандағы азық-түлік себетіне 160 тауар кіреді, олардың тек 19-ы ғана мемлекеттік реттеуге жатады. Биыл жыл басынан бері әлеуметтік маңызы бар азық-түлік тауарлары индексі 8% өскен. Дегенмен тамыз айында өзгеріссіз қалған, ал қыркүйектің үш аптасында бар болғаны 0,2% ғана көтерілген.
«Оң динамика әсіресе көкөніс тобы бойынша айқын байқалады. Тамыз айының басынан бері баға өсімінің қарқынын орта есеппен 2,5 есе төмендетуге мүмкіндік туды. Шілде айында килограмы 300 теңге болған картоп бүгінде 184 теңгеден сатылуда – бұл тіпті өткен жылғы деңгейден де төмен. Сәбіздің бағасы 295 теңгеден 193 теңгеге, ал пияз 222 теңгеден 137 теңгеге дейін арзандады», – делінген министрлік хабарламасында.
Ведомство дерегінше, тұрақтылықты басқа да негізгі өнімдер көрсетіп отыр.
«Жыл басынан бері сүт өнімдерінің бағасы бар болғаны 5,3% өскен. Қарақұмық жармасы 8,9% қымбаттағанымен, оның азық-түлік себетіндегі үлесі аз болғандықтан, жалпы индексіне әсері мардымсыз. Оның үстіне макарон, ұн және күріш сияқты тауарлар бүгінде өткен жылға қарағанда арзан», – деп қосты министрлік.
Ал Ауыл шаруашылығы министрлігі қазақстандықтардың сиыр еті бағасының қымбаттауына қатысты алаңдаушылығын мойындады.
Ведомствоның мәліметінше, 1 келі еттің орташа өзіндік құны шамамен 2 800-3 100 теңге. Көтерме саудадағы 15% үстемеақыны қосқанда, баға 1 келі үшін 3 400-3 500 теңге деңгейінде қалыптасады.
«Салыстырып қарасақ, өңір елдерінде сиыр етінің бөлшек бағасы әлдеқайда жоғары: Өзбекстан мен Тәжікстанда – 6 500 теңгеге дейін, Ресейде – 8 500 теңгеге дейін, Қытайда – 8 000 теңгеге дейін, Түрікменстанда – 9 000 теңгеге дейін, Түркияда – 13 000 теңгеге дейін», – делінген хабарламада.
Министрліктің түсіндіруінше, ірі қара малдың бір тұтас етінен тірі салмағының 50-60%-ы ғана ет ретінде шығады. Оның ішінде 15-20%-ы премиум санаттағы бөліктерге жатады, олардың бағасы жоғары. Орташа деңгейдегі ет – шамамен 40-45%, төменгі деңгей – 25% шамасында. Ал сүйек, май және ет ретінде жарамсыз қалдық бөлігі 15-20%-ды құрайды.
Осылайша, ведомствоның айтуынша, бөлшек саудадағы сиыр еті бағасы тек өзіндік құнға ғана емес, сонымен бірге еттің санатына, тағамдық құндылығына, малдың семіздігіне және қайта өңдеу тәсіліне байланысты қалыптасады. Майы аз ет арзандау болса, жоғары мәрмәрлі әрі жұмсақ құрылымды ет кесінділері премиум санатқа жатады да қымбат болады.
Ауыл шаруашылығы министрлігі бағаның негізсіз өсуін тежеу бойынша жүйелі шараларды іске асырып жатқанын жеткізді.
