Қазақстанда міндетті әлеуметтік медициналық сақтандыру (МӘМС) жүйесіне қатысты маңызды өзгеріс енгізілді. Енді азаматтар жарна төлеуді уақытша тоқтатқан жағдайда да алты ай бойы медициналық қызметтерді пайдалануға құқылы болады. Бұл туралы 7-su.kz ақпараттық порталы хабарлайды.
Мәжілісте екінші оқылымда қабылданған заң жобасына депутаттардың ұсынысымен жаңа норма енгізілді. Атап айтқанда, бұрын МӘМС жарналарын бірнеше ай төлемей қалған азаматтар жүйеден автоматты түрде шығарылып, медициналық көмекке қол жеткізе алмайтын. Тіпті ұзақ жылдар бойы тұрақты жарна төлеп келген мұғалімдер мен мемлекеттік қызметкерлер де жазғы еңбек демалысы кезінде жүйеден тыс қалып жататын.
Енді бұл олқылық реттелмек.
«Бұрын екі-үш ай жарна төлемей қалсаң, жүйеден шығарып жіберетін. Енді ондай болмайды. Егер адам бірнеше жыл бойы үзіліссіз жарна төлеген болса, оған жарна төлеу тоқтатылған күннен бастап алты айлық емделу мүмкіндігі беріледі,» – деді Мәжіліс депутаты Асхат Аймағамбетов.
Бұл өзгеріс МӘМС жүйесіне сенімді арттырып, азаматтардың үздіксіз медициналық көмек алуын қамтамасыз етуге бағытталған.
