2026 жылдың басынан бері 3 335 этникалық қазақ атамекенге қоныс аударып, ресми түрде қандас мәртебесін иеленді, – деп хабарлайды 7-su.kz ақпараттық порталы.
Еңбек және халықты әлеуметтік қорғау министрлігінің мәліметінше, бұл үрдіс елдің демографиялық өсімі мен еңбек нарығының жандануына септігін тигізеді. Тәуелсіздік алған 1991 жылдан бері республикаға барлығы 1 млн 168 мыңнан астам қазақ оралған. Бұл көрсеткіш мемлекеттің көші-қон саясатының жүйелі жүзеге асып жатқанын дәлелдейді.
Көштің бағыты мен құрамы
Биылғы көштің географиясына тоқталсақ, қандастардың басым бөлігі көршілес елдерден келген:
- Қытай Халық Республикасынан – 47,8%;
- Өзбекстаннан – 43,6%;
- Түркменстаннан – 2,7%;
- Моңғолиядан – 2,2%;
- Ресейден – 2%.
Келген азаматтардың 58,1%-ы еңбекке қабілетті жаста болса, 33,1%-ы – балалар, ал 8,8%-ы – қарттар. Білім деңгейі бойынша қандастардың 13,1%-ы жоғары білімді, 27,1%-ы орта кәсіби білімі бар мамандар. Бұл кадр тапшылығы байқалатын өңірлер үшін маңызды ресурс саналады.
Қазіргі уақытта мемлекет еңбек күші жетіспейтін солтүстік және шығыс өңірлерге қоныстануды ынталандыруда. Атап айтқанда, Ақмола, Абай, Қостанай, Павлодар, Шығыс және Солтүстік Қазақстан облыстары негізгі қабылдау аймақтары болып белгіленген.
Отанға оралған ағайынға көрсетілетін жеңілдіктер:
- Көшуге арналған бір реттік көмек: Отбасының әр мүшесіне 70 АЕК немесе шамамен 302,8 мың теңге беріледі.
- Тұрғын үй жалдау ақысы: Бір жыл бойы ай сайын 15-30 АЕК (64,9-129,8 мың теңге) аралығында өтемақы төленеді.
- Экономикалық мобильділік сертификаты: Тұрғын үй сатып алу немесе салу үшін 1 625 АЕК, яғни 7 млн теңгеге дейін өтеусіз қаржылай көмек қарастырылған.
Жыл басынан бері 139 қандасқа мемлекеттік қолдау көрсетіліп, оның ішінде 108 адам тұрақты жұмысқа орналасқан. Мұндай шаралар қандастардың жаңа ортаға тез бейімделуіне және ел экономикасына үлес қосуына мүмкіндік береді.
