Қызылорда облысында ежелгі дәуірге жататын ерекше археологиялық олжа табылды. Облыстық тарихи-өлкетану музейінің мамандары құнды жәдігерді сонау Бор дәуірінде өмір сүрген тіршілік иесіне тиесілі болуы мүмкін деген болжам айтып отыр.
Экспедиция Қармақшы ауданының орталығынан солтүстікке қарай 90 шақырым жерде жүргізілген. Ғалымдар бұл аймақты Шах-Шах шатқалы деп атайды. Алдын ала зерттеу нәтижесінде табылған сүйек үлгілері нақты анықтау үшін палеонтологтарға жіберілді.
Музейдің ғылыми хатшысы Асхат Сайлаудың айтуынша, 1968 жылы дәл осы аумақтан «Аралозавр» деп аталған динозаврдың бас сүйегі табылған.
«Қазақстанда палеонтологиялық кешендер өте санаулы. Сондықтан мұндай табылған жәдігерлердің көбі баға жетпес құндылық болып саналады. Алдағы уақытта өңірде ғылыми-зерттеу жұмыстары жалғасады», – деді музейдің ғылыми хатшысы Асхат Сайлау.
Мамандардың айтуынша, мұндай олжалар аймақтың ежелгі экожүйесін зерттеу мен Қазақстанның табиғи тарихын толықтыруға үлкен үлес қосады.
Дереккөз: opennews.kz
