ҚР Альпинизм және жартасқа өрмелеу федерациясы (ФАС) халықаралық ынтымақтастық жөніндегі сарапшы, JA SA басшысы Флорент Блазермен, Швейцария, Лозаннамен өтеусіз негіздегі серіктестік туралы келісімге қол қойды.
Федерацияның баспасөз қызметінің хабарлауынша, келісім альпинизм, жартасқа өрмелеу, ски-альпинизм және мұзға өрмелеу бойынша халықаралық байланыстар мен жобалар саласындағы ынтымақтастықты дамытуға, сондай-ақ халықаралық іс-шараларды, бағдарламалар мен перспективаларды басқаруды жетілдіруге бағытталған.
Ынтымақтастықтың негізгі мақсаты — федерацияның альпинизммен, спорттық жартасқа өрмелеу және мұзға өрмелеумен айналысатын шетелдік ұйымдармен халықаралық байланыстарын нығайту; қазақстандық спортшылар мен жаттықтырушылардың даярлық деңгейін арттыру үшін халықаралық тәжірибе мен сараптама тарту, халықаралық жарыстарды, конференцияларды, оқу-жаттығу лагерлері мен семинарларды ұйымдастыру.
Серіктестер халықаралық тәжірибе, білім және технологиялармен алмасу, федерацияның халықаралық спорттық және білім беру бағдарламаларына қатысуы бойынша консультациялар, қазақстандық спортшылар мен жаттықтырушыларға халықаралық іс-шаралар мен жарыстарға сапарларды ұйымдастыруға жәрдемдесу бойынша негізгі мәселелерді талқылады.
Олимпиада жүлдегерлерімен кездесуде Мемлекет басшысы Қасым-Жомарт Тоқаев чемпиондарды марапаттарымен құттықтап, бірқатар күрделі мәселеге тоқталып, жаттықтырушылар базасын нығайтып, шетелдік жаттықтырушыларды шақыру қажеттігін атап өтті.
Федерация штабы барлық ұйымдастыру және үйлестіру жұмыстарын жүйелі түрде жүргізіп келеді, бұл жаттықтырушылар мен спортшылардың оқу-жаттығу процесіне терең бойлауына мүмкіндік береді. Будапештте өткен іріктеу ойындарында федерацияның үш спортшысы жоғары нәтиже көрсетіп, Әмір Маймұратов Олимпиада лицензиясын жеңіп алды.
Бұған дейін хабарланғандай, биылғы жылы Олимпиада ойындарының тарихында тұңғыш рет Парижде өткен Олимпиадада қазақстандық спортшымыз Әмір Маймұратов «Жылдамдық» түрінен спорттық өрмелеуден әлемнің ең мықты бес спортшысының қатарына енді.
Іріктеу жарысының бірінші күні Әмір 4.89 көрсеткішпен Олимпиада рекордын жаңартып, 15 метрлік өрмелеу қабырғасына көтеріліп, ширек финалға шықты.
Бұл жетістікті Мемлекет басшысы олимпиадашылармен кездесу барысында атап өтті.
— Биыл олимпиадада алғаш рет ұсынылған жартасқа өрмелеуден спортшыларымыз керемет нәтиже көрсетті. Қалай болғанда да, жасына және бұрынғы сіңірген еңбегіне қарамастан әркім өзінің осы медальдарды иеленуге құқылы екенін дәлелдеді. Кейбіреулер үшін бұл үлкен спорттық жетістіктер әлемінің бастамасы ғана. Олардың есімдерін әлі талай естіп, осы салтанат залында тағы көретініміз анық, – деді Президент.
Бұл федерация үшін жаңа жаһандық міндеттер тудырады. Спортты дамытуға күш-жігер жұмсалған сайын, спортта жаңа жұлдыздардың пайда болу мүмкіндігі соғұрлым жоғары болады. Федерация әу бастан нәтижеге бағытталған және өз жұмысында спортшыларды дайындау орталықтарының өңірлік және халықаралық желісімен заманауи инфрақұрылымды дамытуға, әлемдік деңгейдегі турнирлер мен чемпионаттарға қатысу үшін халықаралық серіктестік келісімдерін жасауға ерекше көңіл бөледі.
— Олимпиада рекордын орнатқан спортшымыз Әмір Маймұратовтың жетістігі бүкіл Қазақстанның, бүкіл федерацияның жеңісі болды. Спорттық жартасқа өрмелеу – салыстырмалы түрде жас спорт түрі, соған қарамастан, спортшыларымыз тұрақты табысқа жетіп келеді. Біздің міндетіміз – альпинизмді, спорттық жартасқа өрмелеуді және шаңғымен сырғанауды ұлттық спорт түрлерінің біріне айналдыру. Біз федерация ретінде әлемдік стандартқа сай барлық жағдайды жасасақ, спортшылар жаңа жеңістерге бар күш-жігерін салып, халықаралық аренада Қазақстанды лайықты деңгейде таныта алатынына сенімдімін. Бұл келісімге қол қою спортшыларға ең жақсы нысандарда жаттығуға, жаттықтырушыларға – халықаралық ынтымақтастық шеңберін кеңейтуге, спортшылардың үздіктерін дайындауда жаңа, неғұрлым өнімді халықаралық тәсілдерді енгізуге мүмкіндік береді. Отандық спортты меценаттар белсендірек қолдағанын қалаймын, өйткені патриотизм деген осы емес пе?. Спортшыларды дайындауға кәсіби көзқарасты қалыптастырудағы барлық құрамдас бөліктерді біріктіру арқылы біз осы динамикалық тәртіп бойынша кәсіби мамандарды дайындай аламыз, — деді Қазақстан Республикасы Альпинизм және спорттық жартасқа өрмелеу федерациясының президенті Нұрсұлтан Шоқанов.
Дереккөз: KAZINFORM
Фото: adrenalinicsilence.kz
