Облыстық мәслихаттың ауылшаруашылығы, жер қатынастары, ветеринария және экология мәселелері бойынша тұрақты комиссиясының отырысы өтті. Онда Қазақстан Республикасында қант саласын дамыту жөніндегі 2022–2026 жылдарға арналған кешенді жоспардың орындалуы, әлеуметтік маңызды тауарлар мен қызметтердің бағасын тұрақтандыру мен төмендету бойынша жергілікті атқару органдарының жұмысы, Жер кодексінің талаптарын жүзеге асыруда жер қатынастары мекемелерінің атқарған жұмысы, инвестициялық салымдар кезінде агроөнеркәсіптік кешен субъектісі шеккен шығындардың бір бөлігін өтеу бойынша субсидиялау жұмысы сынды мәселелер қаралды.
Отырыста облыстық ауылшаруашылығы басқармасы басшысының орынбасары Бахтияр Шампиков, облыстық кәсіпкерлік және индустриялық-инновациялық даму басқармасындағы сауданы дамыту бөлімінің басшысы Нұрлан Әзірбаев, облыстық жер қатынастары басқармасының басшысы Ермек Апеков баяндама жасап, атқарылған жұмыс реті мен алдағы жоспарларын таныстырды. Облыстық табиғи ресурстар және табиғатты пайдалануды реттеу басқармасының басшысы Елдос Мырзабек орман шаруашылығындағы өрт сөндіру мәселесі бойынша ұсыныс білдірді. Ал Ақсу ауданы әкімінің орынбасары Ғазиз Есжанов, Ескелді ауданы әкімінің орынбасары Айдын Исабеков, Кербұлақ ауданы әкімінің орынбасары Жанат Жүнісбек туындаған сұрақтар бойынша жауап берді.
Олардың айтуынша, 2022 жылы қант қызылшасының егіс көлемі 6 мың гектарға жоспарланып, нақты 4,2 мың гектар себілсе, былтыр қызылшаның егіс көлемі 8,1 мың гектарға жоспарланып, 8,7 мың гектарға жетті. Биыл Ақсу және Көксу қант зауыттары 93 мың тонна шекер алуды жоспарлауда. Оған екі зауыттың әлеуеті жетеді. Айталық, Ақсу қант зауытының тәуліктік өңдеу қуаттылығы 2800-3000 тонна, жылдық қуаттылығы 450 мың тонна болса, Көксу қант зауыты жылына 250 мың тонна қант қызылшасын өңдейді.
Облыста қант қызылшасы бағытында 17 сервистік-дайындау орталығы құны 3,8 млрд.теңге болатын 380 бірлік техниканы пайдаланады. Биыл қант қызылшасы бағытында 5 ауданда жаңа 8 сервистік-дайындау орталығын құруға жергілікті бюджет есебінен 30 шаруа қожалығына жалпы 2,5 млрд. теңгеге 62 бірлік себу және өнімді жинау техникасы алынады. Қант қызылшасын өңдеу, осы бағытынан жаңылмаса, 2028 жылға барғанда егістік алқабы 16 мың гектарға дейін жетпек.
Ал азық-түлік тауарларынан қырыққабат, картоп, пияз, сәбіз, күнбағыс майы, жұмыртқа және қант өнімдерінің негізгі түрлері бойынша облыс өз өндірісі есебінен толық қамтамасыз етілген. Биыл қырыққабат 0,9 мың, пияз 1,02 мың, картоп 6,5 мың, сәбіз 0,9 мың, күріш 1,2 мың гектарға егілген. Өнім көлемі де айтарлықтай жақсы болады деп күтілуде. Жалпы облыста ауылшаруашылығы өнімдерін өңдейтін 122 кәсіпорын бар. Былтыр облыстың агроөнеркәсіптік кешендерін субсидиялауға 3161 млрд. теңге бөлініп, инвестициялық субсидиялаудың барлық бағыттары бойынша берілген 588 өтінім бойынша төлем жүргізілді. Бүгінгі күнге бағдарлама аясында 613 өтінім қарастырылуда.
Мемлекет басшысы Қасым-Жомарт Кемелұлы Тоқаевтың «Әділетті мемлекет. Біртұтас ұлт. Берекелі қоғам» атты Жолдауында пайдаланылмаған ауылшаруашылық мақсатындағы жерлерді мемлекет меншігіне қайтару туралы тапсырма берілген. Осыған орай облыс бойынша 2022 жылы 100 мың, былтыр 220 мың, биыл 90 мың гектар жерді қайтарудың жоспары бекітілді. Осы мақсатта жұмыс тобы құрылып, нәтижесінде 2022 жылы 128,5 мың, былтыр 246,5 мың, биыл есепті кезеңде 113,5 мың гектар, жалпы 3 жыл ішінде 488,5 мың гектар жер мемлекет меншігіне қайтарылды. Оның ішінде 17,6 мың гектары егістік, 0,8 мың гектары шабындық, 470 мың гектары жайылымдық мақсаттағы жерлер. Қайтарылған жерлердің ішінде нысаналы мақсатына сай пайдаланылмаған 10 ірі жер пайдаланушыдан 144 мың гектар жер қайтарылды. Демек, мемлекет басшысының тапсырмасы облыста толығымен орындалды. Бұл жетістік алдағы уақытта да еселене түспек.
Жиын соңында тұрақты комиссия төрағасы Айбек Искаков депутаттар шілде айының 15-31 күндері облыстың орман шаруашылықтарын аралап, отырғызылған ағаштарға жүргізілген мониторинг нәтижесін таныстырды.
Қажет АНДАС
