Достық үйінің мәжіліс залында «Саламатты ұлт» жастар форумы өтті. Жиналғандар алдында облыстық полиция басқармасы, облыстық наркологиялық орталық, «Қос қанат» қоғамдық ұйымы, «Жетісу» футбол клубы және есірткі қылмысының алдын алу кеңесінің өкілдері сөз сөйледі.
Жастар арасында саламатты өмір салтын насихаттау, есірткінің зиянын ашық талқылау, өскелең ұрпақты саналы да жауапты таңдауға шақыру мақсатында ұйымдастырылған форумға облыстық Қазақстан халқы ассамблеясының жастары, колледж және жоғары оқу орындарының студенттері, жоғары сынып оқушылары, спорт белсенділері, үкіметтік емес ұйым жетекшілері қатысты.
Форум басталмас бұрын қатысушылар наркологиялық тестілеу аймағымен танысып, «Бір таңдау – бір өмір» бейнефильмін тамашалап, саламатты өмір салтына арналған тақырыптық көрмені көрді. Одан кейін студенттер Достық үйінің акт залында профилактикалық сахналық қойылым көрсетті. Облыстық есірткі қылмысына қарсы күрес басқармасының жедел уәкілі полиция подполковнигі Меруерт Ысқақова өңірдегі есірткі бизнесінің қазіргі жағдайын талқылап, алдын алу шараларына жастардың қатысуының маңыздылығын атап өтті.
Облыстық наркологиялық орталықтың нарколог дәрігері Мақсат Ерғабылов нашақорлықтың зияны және медицина тұрғысынан тәуелділіктің алдын алу әдістері туралы айтты.
«Қос қанат» үкіметтік емес ұйымының жетекшісі Елена Радионова мен сол ұйымның психологы Елена Пискунова қоғамдық қызмет саласындағы өз тәжірибелерімен бөлісіп, алдын алу шараларын ұрпақтар арасындағы ашық диалогтан, жастарды белсенді тартудан бастау керектігін тілге тиек етті.
«Жетісу» телерадиокомпаниясы жаңалықтар бөлімінің бас редакторы Антон Хатеновский саламатты қоғамды қалыптастырудағы бұқаралық ақпарат құралдарының рөлі мен әрбір азаматтың жеке жауапкершілігіне тоқталды. Облыстық әкімшілік жанындағы Есірткі қылмысының алдын алу жөніндегі кеңестің мүшесі Бархудар Гусенов барлық қатысушыны ауызбіршілікке, нашақорлықпен күресте белсенді болуға шақырып, форумды қорытындылады.
Іс-шараның соңы пікірталас пен сұрақ-жауапқа арналған ашық алаңға ұласып, «Біз – саламатты ұлтпыз!» ұранымен аяқталды.
Еңлік КЕНЕБАЙ
