Мемлекет басшысының бастамасымен елімізде «Келешек мектеп» ұлттық жобасы жүзеге асырылуда. Осы жоба шапағатымен өткен оқу жылында Жаркент қаласында 1200 орынды жайлы жаңа мектеп оқушыларға есігін айқара ашқан болатын. Орта білім сапасын арттыруға және қала мен ауыл мектептері арасындағы алшақтықты жоюға бағытталған стратегиялық бастама бойынша Талды ауылында заманауи үлгіде салынған 300 орынды жаңа мектеп ғимараты пайдалануға берілді. Мектеп құрылысын «Жөндеу – Құрылыс» ЖШС өткен жылдың маусым айында бастаған болатын. Білім беру қорының 2,9 миллиард теңге қаржысына салынған ғимарат жаңа оқу жылына сақадай сай дайын тұрды. Ғимаратта 80 орынды жиынжай, спорт зал, кітапхана, 60 орынды асхана және заманауи үлгіде жабдықталған сынып бөлмелері бар. Мұнда биылғы оқу жылында екі ауысымда 402 оқушы білім алады. Оларға 54 ұстаз білім берсе, олардың біреуі педагог – шебер, 7 педагог – зерттеуші, 24 педагог – сарапшы, 29 педагог – модератор қызметін атқарады.
Жаңа мектептің ашылу салтанатына облыс әкімінің орынбасары Диас Есдәулетов, Панфилов ауданының әкімі Марат Сағымбек және ауданның білім беру саласының ардагерлері, ауыл тұрғындары және мектеп ұстаздары мен оқушылары қатысты.
Алдымен сөз сөйлеген облыс әкімінің орынбасары Диас Есдәулетов елімізде және аймақта білім беру саласына жасалып жатқан жақсылықтарды жіпке тізгендей жіліктеп жеткізді. Талды ауылында пайдалануға беріліп отырған жаңа мектептің оқушылары мен ұстаздарына толайым табыс, сәттілік тіледі.
Сөзін Конституцияның 30 жылдық мерейтойымен бастаған Панфилов ауданының әкімі Марат Сағымбек ұстаздар ұжымы мен оқушыларды, ата-аналарды жаңа оқу жылымен құттықтап, заманауи сәулеткерлік үлгіде сапалы іс тындырған, ауылға көрік сыйлап тұрған сәнді ғимарат салған құрылысшыларға алғыс сезімін білдірді. Құрылыс ұйымының басшысы Жандулла Абдимұратовтың иығына шапан жауып, Алғыс хатын тапсырды.
Бұл қуанышқа бұрын осы мектепте білім алған ауыл тұрғындары, алыста жүрген азаматтар, еңбек ардагерлері көп жиналды. Салтанатқа арнайы келген, бұрын мектепте басшылық қызмет атқарған ардагер Өмекбай Есмұратұлы ауылдастарын жаңа оқу жылымен құттықтаған ыстық сәлемін жеткізді. Ауыл мектебінің тарихынан естеліктер айтты. Жиын соңында жаңа мектептің ашылу рәсімі жасалып, оқушылардың шағын концерті көрсетілді. Қуанышқа жиналған жұрт мектеп үйін аралап көрді.
Мырзағали Нұрсейіт
Панфилов ауданы
