Достық үйінде «Жетекші журналистер» клубының отырысы өтіп, саяси-конституциялық реформалардың қорытындыларын бұқаралық ақпарат құралдары арқылы қоғамға түсіндіру мәселелері талқыланды. Жиынға журналистер, сарапшылар және ақпарат саласының мамандары қатысып, реформалардан кейінгі кезеңдегі ақпараттық жұмыстың негізгі бағыттарын сөз етті.
Клуб төрағасы Атсалим Идиговтың айтуынша, ауқымды саяси және конституциялық реформалар кезеңінің аяқталуы ақпарат құралдарының алдында жаңа міндеттер қойып отыр. Ендігі жерде басты назар реформалардың нәтижелерін халыққа түсінікті әрі қарапайым тілмен жеткізуге аударылуы қажет.
Спикердің пікірінше, азаматтар жаңа Конституцияның негізгі нормаларын, мемлекеттік басқару жүйесінде болған өзгерістерді, жаңадан құрылған мемлекеттік институттардың қызметін және өз құқықтары мен мүмкіндіктерін білуі маңызды. Осы орайда теледидар, газет-журналдар, интернет-басылымдар мен әлеуметтік желілердің мүмкіндігін тиімді пайдалану қажет.
Кездесуде Халық кеңесінің қалыптасуы, бір палаталы Парламенттің құрылуы және вице-президент лауазымының енгізілуі сияқты өзгерістерге қатысты ақпаратты халыққа жеткізу мәселелері де қаралды. Реформалардың мазмұнын түсіндіру барысында күрделі құқықтық нормаларды көпшілікке түсінікті тілде ұсынудың маңызы да сөз болды.
Жиында қазіргі ақпарат кеңістігіндегі маңызды бағыттардың бірі – жасанды интеллектіні қолдану мәселесіне де назар аударылды. «Қоғамдық келісім» КММ Ақпарат және қоғаммен байланысты үйлестіру бөлімінің аға сарапшысы Эмил Курбанов журналистика саласында жасанды интеллект құралдарын пайдаланудың құқықтық және практикалық қырларына тоқталды.
Талқылау барысында журналистің материал дайындау кезінде жасанды интеллектіні пайдалануына қатысты мәселелер, ақпараттың ашықтығы және авторлық құқықтың сақталуы сөз болды. Сондай-ақ жаңа технологияларды қолдану кезінде нені ескеру қажет, қандай тәуекелдерге назар аудару керек және оның мүмкіндіктерін қалай тиімді пайдалануға болатыны талқыланды.
Кездесу барысында айтылған пікірлер ақпарат құралдарының қоғамға жаңалық жеткізумен ғана шектелмей, елдегі маңызды өзгерістердің мәнін түсіндіруде де рөл атқаратынын көрсетті. Осы бағытта журналистер мен сарапшылардың өзара тәжірибе алмасуы және жаңа ақпараттық құралдарды меңгеруі де таразыланды.
Жиын соңында қатысушылар саяси және конституциялық өзгерістерді ақпараттық сүйемелдеу, азаматтарға құқықтық ақпаратты түсінікті жеткізу және жасанды интеллект секілді жаңа технологияларды жауапкершілікпен пайдалану мәселелері бойынша пікір алмасты.
Дастанбек САДЫҚ
