Ел Президенті Қасым-Жомарт ТОҚАЕВТЫҢ биылғы «Әділетті Қазақстан: Заң мен тәртіп, экономикалық өсім, қоғамдық оптимизм» атты Жолдауын ыждағатпен тыңдадым. Бұл ел өміріндегі шын мәнінде үлкен бетбұрысқа негіз болар саяси жаңғыруға толы жаңалықтардың жаршысы дер едім.
Жолдау қарапайым халықты көптен толғандырып жүрген маңызды мәселелерге негіз болды. Әсіресе Президенттің жергілікті биліктің қызметін бұрынғыдан да жандандыру бағытында аудан, қала әкімдерін де халықтың қалауымен, яғни сайлаумен бекіту жөніндегі тұжырымдары көкейге қонымды бастама деп білемін.
Президенттің атом электр стансысын салып, шетелдерге электр қуатына байланысты тәуелділіктен құтылу жөніндегі бастамасының да мемлекет экономикасының нығаюына тигізер әсері зор. Отандастарымыз бұл жаңалыққа жатырқап қарамай, береке беретін бастаманы қолдағаны абзал.
Әлемдік саяси кеңістіктегі орын алып отырған қарулы қақтығыстар мен мемлекетаралық дүрдараз мәселелердің еліміздің әлеуметтік, экономикалық даму үрдісіне салқыны тиетіні анық. Дегенмен, қарапайым халық үшін ең бастысы азық-түлік өнімдерінің шамадан тыс қымбаттамауы шарт. Бұл орайда Мемлекет басшысының Жолдауындағы Үкіметке көктемгі егін егу науқанына тыңғылықты дайындалу жөніндегі тапсырмасы маңызды тұжырым.
Біздің елде халықты азық-түлікпен қамтамасыз етудің негіздері баршылық. Ежелден шаруа баққан аграрлы елдің осы мүмкіндіктерінің нәтижелі жұмыс жасауына билік тарапынан шынайы, адал қамқорлық керек.
Рахметолла ТҰРЛЫБАЕВ,
Панфилов ауданының Құрметті азаматы
Жаркент қаласы
Фото: aikyn.kz
