Алакөл ауданындағы мал басы жыл сайын өсіп, жақсы көрсеткіштерге жетуде. Биыл ірі қара 87841, қой-ешкі 271272, жылқы 33 800, түйе 748 басқа жетсе, тағы да басқа жануарлар мен құстардың саны арта түскен. Ауданда сыйымдылығы 6300 басқа арналған 6 мал бордақылау алаңы жұмыс істейді. Қара суық түсісімен мал бордақылау басталады.
Жыл басында жоспарланған 326,5 мың тонна шөп, пішендеме, сабан, сүрлем, құрамажем қоры толық дайындалды. «Алакөл» несие серіктестігіне «Кең дала», «Агробизнес» бағдарламалары бойынша 44 шаруа қожалықтан жалпы көлемі 921,0 млн. теңгеге сұраныс түсіп, 31 шаруашылық қаржыландырылған.
«Ауыл аманаты» жобасының І кезеңі бойынша елді мекен тұрғындарынан «Жетісу» ӘКК» ӨДИ» АҚ-на жалпы көлемі 251,8 млн. теңгеге 34 өтінім түсіп, 3 өтінім кері қайтарылса, 31 өтінім қаралып, оның 26-сы мақұлданып, 19 өтінімге 110,2 млн. теңге несие берілді. Қазір 7 өтінім несие беруге дайын. Құжаттарының толық және дұрыс болмауына байланысты 5 адамның өтінімі толықтырылу үстінде. «Ауыл аманаты» жобасының ІІ кезеңі бойынша 37 адамнан жалпы қаражат көлемі 267 млн. теңгеге өтінім түскен.
Айта кетерлігі, жыл сайын Алакөл ауданының Лепсі ауылында республикалық мал шаруашылығы көрме-конференциясы өткізіледі. Онда отандық және шетелдік сарапшылардың қатысуымен мал шаруашылығының жай-күйі талқыланады. Көрмеге қатысушылар аукцион арқылы асыл тұқымды мал басын сатып алуға мүмкіндік алды. Бұл өз кезегінде Алакөл ауданындағы мал шаруашылығымен айналысатын шаруа қожалықтарының мал басын асылдандыруға да ықпалын тигізуде.
Қажет Андас
Алакөл ауданы
