Бүгінде Жетісу облысында 32 754 гектар жерде шегіртке тектес зиянкестерге қарсы химиялық өңдеу жүргізілген, оның 21 824 гектары итальяндық прус, қалғаны үйірсіз саяқ шегірткелер. Химиялық өңдеу 18 жер үсті техникалары мен 3 борт ауыл шаруашылығы ұшағымен жүргізілген. Аталған жұмыстар қазір жоспарға сай жалғасуда.
Бұл туралы Журналистер үйінде өткен брифингте ҚР Ауыл шаруашылығы министрлігінің агроөнеркәсіптік кешендегі мемлекеттік инспекция комитетінің облыс бойынша аумақтық инспекциясының басшысы Мәулен Жұмағалиев пен облыстық ауыл шаруашылығы басқармасы басшысының орынбасары Бахтияр Шампиков баян етті. Сондай-ақ, журналистер қойған сұрақтарға да жауап берілді.
Мәулен Бүркітқалиұлының айтуынша, биыл шегіртке тектес зиянкестерге қарсы химиялық өңдеу жұмыстары 114,8 мың гектар жерде жүргізілмек, оның 74,6 мың гектары үйірлі шегіртке, қалғаны үйірсіз саяқ шегірткелер. Шегіртке тектес зиянкестерге, басқа да аса қауіпті зиянды организмдер мен карантинді нысандарға қарсы күрес ұйымдастыру үшін облыстық және аудандық штабтар құрылып, жұмыстар атқарылуда.
Осы жылы шегіртке тектес зиянкестерге қарсы жалпы 455,85 млн. теңге бөлінген, оның 284,75 млн. теңгесі республикалық, 171,1 млн. теңгесі жергілікті бюджет есебінен. Қазіргі уақытта үйірлі шегірткеге қарсы химиялық өңдеу жұмыстарын жер үсті тәсілімен жүргізетін компаниялар анықталған. Сонымен қатар, саяқ шегірткелерге қарсы химиялық өңдеуді жер үсті тәсілімен жүргізетін мердігер компания анықталса, аса жеңіл авиациямен өңдеу жүргізетін компанияны анықтау бойынша мемлекеттік сатып алу байқауы жалғасуда.
Жоспарланған іс-шараларды жүзеге асыру үшін шегіртке тектес зиянкестерді анықтауға жалпы екі жүзден аса адам қатысады. Шегіртке тектес зиянкестерге қарсы химиялық өңдеу кезінде облыс бойынша пайдаланылатын 41 су көздері және 22 жанар-жағармай бекеттері белгіленген.
Айгүл Байжұмақызы
