Жетісу облысы бойынша ҚР ҰҚК Шекара қызметі департаментінде әйел әскери қызметшілер арасында «Жетісу аруы» байқауы ұйымдастырылды, – деп хабарлайды 7-su.kz ақпараттық порталы.
Салтанатты шара әскери қызметтегі нәзік жандылардың тек жауынгерлік дайындығын ғана емес, сонымен қатар шығармашылық қырларын да паш етуге мүмкіндік берді. Сайыс барысында қатысушылар бірнеше кезең бойынша бақ сынап, өз өнерлері мен зияткерлік қабілеттерін ортаға салды. Негізгі мақсат – әскери қызметшілер арасындағы ауызбіршілікті нығайту және Отан қорғау жолында жүрген әйелдердің мәртебесін асқақтату. Қатысушы арулар өздерін таныстыру, шығармашылық өнерлерін көрсету және салт-дәстүрді білу деңгейлері бойынша сынға түсті.
Байқау соңында қатысушылар арнайы номинациялармен марапатталып, көтеріңкі көңіл күйге бөленді. Департамент өкілдері мұндай мәдени шаралардың жеке құрамның моральдық-психологиялық жағдайын жақсартуда маңызы зор екенін атап өтті. Сайысқа қатысқан әрбір ару өзінің тек қатаң тәртіптің иесі ғана емес, нәзіктік пен парасаттылықты ұштастыра білетін тұлға екенін дәлелдеді. Аталған байқау өңірдегі әскери қызметшілердің имиджін қалыптастыруға және ұлттық құндылықтарды жастар арасында насихаттауға зор үлес қоспақ.
