Қаратал ауданында әскери комиссариаттың жаңа форматты жасақталған ғимараты ашылды. Заманауи үлгіде жасалған еліміздегі алғашқы нысанның ашылуына ҚР Қорғаныс министрлігінің аппарат басшысы, полковник Ербол Құмарбекұлы қатысты.
Ербол Құмарбекұлы Мемлекет басшысының қорғаныс саласына ерекше назар аударып отырғанын айтып, елімізде атқарылып жатқан саланы дамыту мен қолдау шараларын баяндады.
– Жаңа үлгідегі әскери нысан Жетісу облысында тұңғыш ашылып отыр. Отан алдындағы борышын өтеуге баратын жастардың әскери өмірмен алғашқы таныстығы осы жерден басталады. Сондықтан нысанның осындай заманауи болғаны дұрыс. Бұл ретте бізге қолдау көрсеткен облыс әкімдігіне ризашылығымызды білдіреміз, – деді.
Сонымен бірге аудан әкімі Ұлан Досымбековке Кеңес одағының батыры, Қазақстанның тұңғыш Қорғаныс министрі Сағадат Нұрмағамбетовтың 100 жылдығына арналған медальді табыстады.
Қаратал аудандық қорғаныс істері бөлімінің тарихы 1932 жылдан бастау алады. Аудандық қорғаныс істері жөніндегі бөлім осы уақытқа дейін Бастөбе ауылдық округінде отырған еді. Жуырда оны Үштөбе қаласындағы басқа ғимаратқа көшіру туралы шешім қабылданып, 2023 жылдың қазан айында бұрын қазынашылық басқармасы болған ғимаратқа жергілікті бюджет есебінен 395 млн. теңге бөлініп, күрделі жөндеуден өткізілген.
Ғимараттың бірінші қабатында әскерге шақыру пункті, медициналық комиссияның тексеру кабинеттері орналасқан. Сондай-ақ әскерге шақырылушыларға арналған казармалық типтегі жатын орын мен тамақтану бөлмесі бар. Екінші қабатта әкімшілік бөлімі отырады. Яғни, әскери басқарманың жергілікті органы мен шақыру пункті бір жерге топтастырылған. Әдетте олар бөлек ғимараттарда орналасатын.
Әскер қатарына жаңадан шақырылған жастардың бірі Досымхан Досымжан: «Отан – қасиетті де қастерлі ұғым. Оны сақтау, қорғау біздің азаматтық парызымыз. Мен Қаратал ауданының тұрғынымын. Жаңадан ашылған ғимараттан әскерге аттанғалы отырмын. Мен және менің қатарлас достарым елімізге адал қызмет етеміз», – деді.
Мұндай игі іске тұрғындар да дән риза. «Күзгі әскерге шақыру науқаны басталды. Облыс жастары енді жаңа нысаннан Отан алдындағы борышын өтеуге аттанады. Бұл солдаттарға жасалған керемет жағдай», – дейді қала тұрғыны Жарбол Ертайұлы.
