Бүгінде мемлекеттік қолдау шараларының арқасында елімізде 580 мың гектардан аса алқапта су үнемдеу технологиялары қолданылуда.
Мемлекет басшысы су үнемдеу технологияларына көшудің маңыздылығын бірнеше рет атап өтті. Осыған байланысты Президенттің жыл сайын 150 мың гектар жерге су үнемдеу технологияларын енгізу жөніндегі тапсырмасын орындау аясында Су ресурстары және ирригация министрлігі шаруаларды заманауи суару жүйелеріне көшуге ынталандыру тетіктерін әзірледі. Облыс әкімдіктерімен бірлесіп, 2030 жылға дейін егіс алқаптарында су үнемдеу жүйелерін енгізу жоспары әзірленіп, бекітілді. Осының нәтижесінде 2030 жылдың соңына дейін жылына 2,2 млрд. текше метр судың үнемделуі көзделіп отыр. Министрлік фермерлерге су үнемдеу технологияларын сатып алу мен орнатуға, сондай-ақ инфрақұрылым тарту кезінде ұңғыма бұрғылауға жұмсалған шығындардың өтемақы мөлшерін 50%-дан 80%-ға дейін ұлғайтты.
Сонымен қатар тариф құнына қарай суару суына сараланған субсидиялар енгізілді. Су үнемдеу технологияларын қолданған жағдайда субсидия көлемі 60%-дан 85%-ға дейін өсіп, қолданбаған жағдайда – тарифке байланысты 50-75%-дан 30-55%-ға дейін төмендейді. Сондай-ақ, лазерлік тегістеуші сатып алуға берілетін субсидия егіс алқабы кемінде 200 гектар болатын шаруашылықтарға ғана төленеді деген талап алынып тасталды.
Лазерлік тегістеу суармалы судың алқап аумағына біркелкі таралуына мүмкіндік беріп, суды 30%-ға дейін үнемдеуге жағдай жасайды. Бұл, әсіресе, қуаңшылыққа бейім аймақтар үшін өзекті. Мұндай технология еліміздегі күріш алқаптарында белсенді қолданылады. Нәтижесінде былтыр су үнемдеу технологиялары 158 мың гектар жерге енгізілді. Оның шамамен 130 мың гектары – оңтүстік аймақтар үлесінде. Жалпы су үнемдеу технологиялары қолданылған жер көлемі 470,2 мың гектарға жетті.
Айгүл БАЙБОСЫНОВА
