Қарасай ауданының Абай ауылында елімізде баламасы жоқ су тазартатын қондырғы іске қосылды. «Kagazy Recycling» жауапкершілігі шектеулі серіктестігі салған жаңа нысанның ашылу салтанатына облыс әкімінің орынбасары Айдарбек Байжанов арнайы келді.
«Kagazy Recycling» компаниясы Қазақстанда қалдық қағаздан картон өнімдерін өндіретін ең ірі кәсіпорын. Суды көп мөлшерде тұтынатын нысан кәріз жүйелеріне салмақ түсіріп, ауаға жағымсыз иіс таратады. Бұл мәселе жайында облыстық экология департаментінің басшысы Қонысбек Байеділов бұған дейін де хабарлаған болатын. Өздерінің өндірістік саясатына қоршаған ортаны қорғауды, табиғат тазалығын сақтауды негіз еткен компания 2017 жылдан бастап осы жобаны жүзеге асыруды қолға алды. Тәулігіне 3,2 мың текшеметр қалдық суды өңдей алатын, қағаз өндіретін кәсіпорындарға арналып жасалған су тазарту стансысын салуға меншік иесі 2 млрд. теңге бөліп отыр.
Салтанатты жиында сөз алған компанияның негізгі акционері Томас Матеос Вернер аталған жобаға жоғары сапалы фин технологиясы пайдаланылып, әлемдік деңгейдегі қондырғы іске қосылғанын айта келіп, осы бастамаға қолдау білдірген облыс және аудан басшыларына алғысын жеткізді. Қуанышқа жиналған қонақтар мен кәсіпорын қызметкерлерін осынау бірегей қондырғының іске қосылуымен құттықтаған «Kagazy Recycling» серіктестігінің бас директоры Виктория Горобцова кәсіпорынның қалдық қағаздарды қайта өңдеу арқылы жасыл экономика саясатын жүзеге асырып, көптеген жасыл желектерді сақтап қалуға мүмкіндік жасап келе жатқандарын тілге тиек етті. Ол сонымен бірге компанияның жеткен жетістіктері мен болашақтағы жоспарлары жайлы айтты.
Айдарбек Естебекұлы алдымен Томас Матеос пен қонақтарды қуаныштарымен құттықтап, ел экономикасын көтеруге, азаматтарды жұмыспен қамтамасыз етуге қосып келе жатқан үлестерін ерекше атап өтті. «Асыл арман» тұрғын үй кешенінің айналасында қоршаған ортаны қорғау мен жасыл экономика саясатын жүзеге асыру мақсатында Қарасай ауданы әкімінің аппараты, тұрғын үй-коммуналдық шаруашылығы және «Kagazy Recycling» серіктестігі арасында әлеуметтік маңызы жоғары үшжақты меморандумға қол қойылып, заманауи технология негізінде салынған бұл нысан табиғат ресурстарын үнемдеумен қатар аумақ экологиясын жақсартуға ықпал етпек. Алдағы уақытта Абай ауылының, «Асыл арман» тұрғын үй кешені мен Іргелі, Кемертоған ауылдарындағы қалдық су мәселесін шешу үшін Қаскелең коллекторына дейін 24 шақырымдық кәріз жүйесін салу қолға алынып отыр. Бұл жобаны аяқтау 2019 жылдың соңына белгіленген.
Сөз соңында Айдарбек Естебекұлы «Kagazy Recycling» серіктестігінің қызметкерлеріне облыс әкімі Амандық Баталовтың ыстық ықыласын жеткізіп, Виктория Горобцоваға өлке басшысының «Алғыс хатын» табыс етті. Тұсаукесер рәсімінен кейін жобаның жетекшісі Денис Соловьев қонақтарды су тазалайтын нысанның жұмысымен таныстырды.
Қуат ҚАЙРАНБАЕВ.
