Ас атасы болған нан тұтыну көлемі төмендемек емес. Сондықтан мұны кәсіпке айналдырғандардың табысы молаймаса, азаймақ емес.
Өйткені ұннан жасалатын тағам түрлеріне сұраныс әрқашан жоғары. Талдықорған қаласындағы «Sardar Export» ЖШС 2012 жылы құрылған. Кәсіпорын қуаттылығы тәулігіне 50 тонна өнім өндіруге қауқарлы. Бірінші және екінші сорттан жасалатын ұн тағамдары «Алтын емел» сауда белгісімен шығарылады.
Тәулігіне 25 мыңға жуық нан, тоқаш жасайтын наубайхана бар. Кәсіпорында ресейлік, италиялық, түркиялық жабдықтар орнатылған. Шетелдік құрылғылар көмегімен тұтынушылар көңілінен шығатындай сапалы өнімдер өндіріледі.
Ендігі кезекте цехты кеңейту көзделіп отыр. Осы мақсатта компания жетекшілігі «Қазақстан халық банк» АҚ-нан 8 пайыз несиеге қол жеткізді. «2021-2025 жылдарға арналған кәсіпкерлікті дамыту жөніндегі ұлттық жоба» бағдарламасы шеңберінде субсидиялау құралы бойынша несиенің пайыздық мөлшерлемесі төмендетіліп, «Даму» қорының кепілдігі берілді.
Бүгінгі таңда «Алтын емел» сауда маркасы бар нан комбинатының Талдықорған мен Текелі қалаларында және Ескелді, Көксу аудандарының жақын ауылдарында 450-ден аса сауда нүктесі қызмет көрсетеді.
А. Ыбырай
Талдықорған қаласы
Фото: damu.kz
