Конституция – тек негізгі құқықтық құжат қана емес, сонымен бірге мемлекет пен қоғам арасындағы сенімнің негізі. Осы тұрғыда ұсынылып отырған өзгерістер билік пен азаматтар арасындағы алшақтықты қысқартуға, мемлекеттік басқарудың ашықтығын арттыруға және нақты қоғамдық сұраныстарға бағдарлануға бағытталған құжат.
«Әділетті және Прогрессивті Қазақстанның Халықтық Конституциясы үшін!» Жалпыұлттық коалициясының мүшелері ҚР Парламенті Мәжілісінің депутаты Болат Керімбек, Руслан Қожасбаев, өңірлік коалиция жетекшісі Арыстанғали Арын Ақсу ауданы «Ақсу Қант зауыты» ЖШС кәсіпорнының еңбек ұжымымен кездесу өткізді.
«Ақсу Қант зауыты» ЖШС өңірдегі іргелі кәсіпорындардың бірі. 1967 жылы ашылған кәсіпорын бүгінде жетекші өндіріс орнына айналған. Зауыт ұжымымен кездесуде Жалпыұлттық коалициясының мүшесі ҚР Парламенті Мәжілісінің депутаты Болат Керімбек Ата Заң жобасында шағын және орта бизнесті қолдау тетіктеріне ерекше назар аударылғанын атап өтті. Кәсіпкерлікті ынталандыру, жаңа жұмыс орындарын ашу және халық табысын арттыру – негізгі басымдық екеніне тоқталды.
Конституция жобасында адам капиталын дамыту басты бағыт екені айтылған. Білім мен ғылымды, инновация мен мәдениетті жүйелі қолдау азаматтардың зияткерлік және әлеуметтік әлеуетін арттыруға негіз болады. Цифрлық құқықтарды, жеке деректерді және зияткерлік меншік институтын конституциялық деңгейде қорғау – құқықтық жүйені заманауи талаптарға бейімдеудің нақты көрінісі. Бұл қадамдар елдің цифрлық экономикаға көшуіне берік негіз қалайды, – деді спикер.
Мағжан ШЫНДӘУЛЕТ
Ақсу ауданы
