Алматы облысы полиция департаментінің есірткі бизнесіне қарсы іс-қимыл басқармасының қызметкерлері Талдықорған қаласында «Есірткіге жол жоқ!» акциясын өткізді.
— Аталаған акция екі мақсатты көздеді. Ең алдымен, жас ұрпаққа есірткінің зияны туралы ақпарат беру, сондай-ақ, коронавирус індетінің таралуын болдырмау. Акция барысында Жетісу жерінің орталығында тәртіп сақшылары «Арбатта» және оқу орындарының жанында тұрғындармен, оқушылармен және олардың ата-аналарымен кездесті. Қызметкерлер есірткінің зияны, оларды қолданудың қайғылы нәтижелері туралы түсіндіру профилактикалық әңгімелер жүргізді. Сондай-ақ, карантиндік шараларды қатаң сақтау қажеттілігі туралы еске салып, арнайы белгілері бар бетперделер таратты, — дейді Алматы облысы полиция департаменті есірткі бизнесіне қарсы іс-қимыл басқармасының бастығы полиция полковнигі Қазбек Мұхамедов.
Тәртіп сақшылары жыл басынан бері облыста 464 қылмыстық құқықбұзушылық анықтаған. Оның ішінде 364 есірткіге қатысты әрекет пен 100 есірткі қылмысы бар.
— Біздің қызметкерлер облыс орталығының тұрғындары мен қонақтарына «Есірткіге жол жоқ!» деген белгісі бар бетперделер табыстады. Азаматтардан «ақ өлімге» теңелетін ғасыр дертінің таралуы туралы қандай да бір ақпарат белгілі болса, тиісті шара қолдану үшін жақын маңдағы полиция бөлімшелеріне дереу хабарласуларыңызды сұраймын, — деп толықтырды полковник Қазбек Мұхамедов.
«ЖЕТІСУ-АҚПАРАТ»
