Бүгінде Жетісу облысының орталығында қаланың ішкі жолдарын ретке келту ісі қарқынды. Осыған байланысты 2027 жылға дейін Талдықорғанда 100 шақырымнан астам жол жөнделмек.
Қалалық жолаушылар көлігі және автомобиль жолдары бөлімінің мәліметінше, биылғы жылы шаһарда 70 шақырымнан аса жол жөнделіп, барлық смарт аялдамалар қалпына келтіріледі. Атап айтқанда, аймақтағы жаңадан бой түзеп келе жатқан «Құлагер», «Бірлік», «Жастар 1 шағын аудандары мен «Солтүстік-Батыс» тұрғын үй алабындағы 107 жаңа көшенің 54 шақырымға жуық жолына құрылыс жұмыстары жүргізілмек. Сонымен қатар, 21 шақырымнан астам жол күрделі жөндеуден өткізіліп, орташа жөндеу бойынша 27,9 шақырым болатын 28 көшенің жол жамылғысын ауыстыру ісі қолға алынып, 17 шақырымнан астам жол ағымды жөндеуден өткізілмек.
Сала мамандарының сөзінше, қаланың ішкі көше жолдарын жөндеу жұмыстары сәуір айында басталып, тамыз айына дейін жалғасады. Ал, көлік ағыны көп Н.Назарбаев даңғылына дейінгі айналымға, яғни Балпық би – Сланов көшелерінің қиылысына және Алматы-Өскемен айналма жолы Желтокқсан – Рақышев көшелерінің қиылысы «Мечта» сауда үйі сынды аумақтарға тағы 4 жаңа бағдаршамдар орнатылады.
– Биылғы жылы жол жөндеу жұмыстарын өткен жылмен салыстырғанда ертерек бастауды жоспарлап отырмыз. Қала тұрғындарының өтініштеріне сай, көшелердегі жол төсемін қалпына келтірілу шұңқырларды тегістеу басты назарда . Сондай-ақ, биыл өткен жылмен салыстырғанда жаңа жол салу, күрделі және ағымды жөндеу жұмыстарының көлемі екі есе артық. Жол құрылысы бойынша қолға алынып жатқан жобаларды 2027 жылы толық аяқтау көзделген, — дейді қалалық жолаушылар көлігі және автомобиль жолдары бөлімінің басшысы Ерлан Ниетбаев.
Айдын КӘЛІМХАН
