Биылғы жыл жалпы жетісулық бағыбаншылар үшін жемісті. Дәл қазір аймақта жеміс-жидек жинау науқаны басталған. Алмадан мол өнім алуды жоспарлап отырғандардың бірі – Талдықорған қаласына қарасты «Жерұйық-Өрлеу» жауапкершілігі шектеулі серіктестігі.
Серіктестік басшысы Ақшабай Дүйсенбекұлының айтуынша, қазір кәсіпорынға тиесілі 5 гектар жерде арнайы алма бағы бар. Бақта пеструшка, старкримсон, салтанат, лимонка, кандиль-синап, белый налив сынды алманың 9 түрі өсіріледі. Бүгінде алма жинау жұмыстары қызу жүріп жатыр. 10-нан аса адам жұмыспен қамтылған. Өнім көрсеткіші де жоғары. Биыл аталған бақтағы әр гектар жерден 20 тонна өнім алынып, жалпы 100 тоннаға жуық алма жиналады деп күтілуде.
– Өздеріңізге мәлім «Жерұйық-Өрлеу» жауапкершілігі шектеулі серіктестігіне қарасты қазір қала орталығында жалпы аумағы 6900 шаршы метрді құрайтын коммуналдық базары бар. Онда ет, сүт, жеміс-жидек, көкөністерді сақтап, сатуға өте қолайлы. Сонымен бірге серіктестікте ауылшаруашылық өнімдерін өсіруге арналған 5 гектар алқапта тамшылатып суарылатын алма бақшасы болуымен қатар сыйымдылығы 6 мың тонналық 3 көкөніс қоймасы, 4800 шаршы метр жылыжай кешені жұмыс жасайды. Мұндағы өндірілген және сақталған өнімдер қысы, жазы қала халқының азық-түлік қажетілігін қанағаттандыру үшін үнемі арзандатылған бағамен базарға шығарылады. Оны тұтынушылар да жақсы біледі. Сондай-ақ, базарда әр аптаның сенбі күндері тұрақты түрде ауылшаруашылығы өнімдерінің жәрмеңкесі өтеді. Бұдан бөлек күзгі жиын-терін мезгілінде Талдықорғанда және Астана, Алматы шаһарларында өтетін жәрмеңкелерге өз өнімдерімізді ұсынамыз. Мұның барлығы қымбатшылықты болдырмау мақсатында үлкен рөл ойнайды, – дейді кәсіпорын басшысы.
Айдын КӘЛІМХАН
