Жетісу облысының орталығы Талдықорғанда Астана күні айрықша аталып өтілді.
Шаһардағы «Жастар» саябағында ұйымдастырылған салтанатты шарада сөз алған қала әкімінің орынбасары Рүстем Бершінбеков жалпы тұрғындарды мерейлі мерекемен құттықтап, аймақ басшыларының ізгі тілегін жеткізді.
– «Астана мемлекетіміздің басты мақтанышы, әрі символы. Бұл кең-байтақ отанымыздың жүрегі. Сан ғасырдан бері азаттықты аңсаған рухты бабаларымыздың арманы болған елдің ордасы, ұлттық нақыштағы қайталанбайтын әсемдікке тұнған айрықша қала. Бүгінде ол әлемді тамсандыра отырып, еліміздің өзге өңірлеріне серпінді дамудың тың үлгісін сыйлады. Осыған байланысты Талдықорған қаласы да жыл санап жасарып жайнап келеді. Қазір аймақта мемлекеттік бағдарламалар аясында көптеген кәсіпорындар ашылып, жаңа шағын аудандар бой көтерді. Қала небір жаңа әлеуметтік нысандармен толығып, халыққа қызмет көрсетудің сапасы артты. Міне, бұл, Жетісу жұртының ортақ жетістігі. Осы орайда мен барша халыққа мықты денсаулық, әрбір отбасына амандық, елімізге береке — бірлік тілеймін!», — деді қала әкімінің орынбасары.
Қала тұрғындарының сөзінше, өткенді еске алмай бүгінге баға беру мүмкін емес. Жалпы жан-жақты дамуға жол алған Жетісу облысының орталығы қазір еліміздің бас қаласына қарап бой түзеуде. Талдықорған қаласының қазіргі көркеюі шынмен де көңіл қуантантарлық. Себебі, кешегі тоқырау жылдары жұрты көшіп, жарығы сөніп, сусыз жылусыз сүреңсіз күйге түскен қала бүгінде адам танымастай өзгерді. Білім мен денсаулық, спорт пен мәдениет, егін, мал шаруашылықтары, кәсіпкерлік басқа да әлеуметтік салалар қайта түледі. Соның арқасында қала қарқынды дамыды. Бұл жалпы талдықорғандықтардың ортық еңбегі.
Астана күніне арналған мерекелік шараның соңы өңір өнерпаздарының концерттік бағдарламасына ұласып, жиналған қауымға шуақты көңіл күй сыйлады.
Айдын КӘЛІМХАН
