Талдықорған қаласында кеше кешкісін жеке тұрғын үйлердің бірінде жарылыс болып, сегіз адам зардап шекті. Бұл туралы «Жетісу» газеті Алматы облыстық төтенше жағдайлар департаментіне сілтеме жасап хабарлайды.
2020 жылдың 26 қарашасында кешкі сағат 20.00 шамасында төтенше жағдайлар департаментінің кезекші пультіне Талдықорған қаласының Еркін ауылы, Қазақстан көшесінің бойындағы жеке тұрғын үйлердің бірінде шағын газ баллоны (сыйымдылығы 5 литр) жарылды деген хабарлама келіп түсті.
Жарылыс салдарынан өрт шыққан жоқ. Алайда тұрғын үйдің қабырғалары мен шатыры қирады. Төтенше жағдайдан 8 адам, оның ішінде, 3 бала зардап шекті. Олардың барлығы медициналық мекемелерге жеткізілді.
Алдын ала болжам бойынша, тұрмыстық газ баллонын жылыту үшін пештің жанына қою жағдайы жарылысқа себеп болған. Оқиға орнында төтенше жағдайдың 28 қызметкері, 8 техникасы, 8 «Жедел жәрдем» бригадасы, полиция, газ қызметі және жергілікті атқарушы органдардың қызметкерлері жұмыс істеді. Сондай-ақ, зардап шегушілердің туыстарына психологиялық көмек көрсету үшін екі психолог маман жұмылдырылды.
Осы оқиғаға байланысты Алматы облысының төтенше жағдайлар департаменті азаматтардан газ баллондарын пайдалану және қолдану кезінде қауіпсіздік шараларын қатаң сақтауды сұрайды.
«ЖЕТІСУ-АҚПАРАТ»
