Талдықорған қаласында тұрғындарды үздіксіз жылумен қамтамасыз ету бағытында маңызды инфрақұрылымдық жоба сәтті жүзеге асырылды, – деп хабарлайды 7-su.kz ақпараттық порталы.
«Энергетикалық және коммуналдық секторларды жаңғырту» ұлттық жобасы аясында шаһардағы жылу желілерін реконструкциялау және күрделі жөндеу жұмыстары толықтай аяқталды. Жергілікті инфрақұрылымды жаңарту қала тұрғындарының тұрмыс сапасын арттыруға және қысқы маусымда апаттық жағдайлардың алдын алуға тікелей бағытталған. Кешенді қайта құру шаралары заманауи технологиялар мен төзімді материалдарды қолдану арқылы жүргізілді.
Атап айтқанда, магистральдық жылу желілерін реконструкциялаудың бірінші кезеңі бойынша Жансүгіров көшесіндегі №3 сорғы станциясынан Гагарин көшесіне дейінгі учаскеде диаметрі 700 мм құбырлар алмастырылды. Белігіленген 3,5 шақырым желі толығымен жаңартылып, жоспарланған жұмыс көлемі 100%-ға орындалды. Бұл магистраль қаланың орталық бөлігін жылумен қамтуда шешуші рөл атқарады.
Сонымен қатар Біржан сал көшесінің бойындағы, Назарбаев көшесінен Жабаев көшесі бағытындағы диаметрі 400, 300 және 250 мм жылу желілеріне күрделі жөндеу жүргізілді. Жоспарланған 1,02 шақырым толық аяқталып, нәтижесінде Талдықорған қаласында екі жоба аясында жалпы ұзындығы 4,52 шақырым жылу желісі ретке келтірілді.
Қазіргі уақытта Энергетика министрлігі Мемлекеттік энергетикалық қадағалау және бақылау комитетінің Жетісу облысы бойынша аумақтық департаменті 2026–2027 жылдардағы жылыту маусымына электр және жылумен жабдықтау нысандарының дайындығына тұрақты мониторинг жүргізуде. Тексеру шаралары тозу деңгейін төмендетіп, коммуналдық қызметтердің сенімділігін арттыруға мүмкіндік береді. Сонымен бірге тұрғын үйлер мен әлеуметтік нысандарға жылуды кедергісіз беру қамтамасыз етіледі.
Өңірдегі коммуналдық инфрақұрылымды жаңғырту – тұрғындардың жайлылығы мен қауіпсіздігінің басты кепілі. Шаһардың жылу жүйесін жаңарту жұмыстары Жетісу облысының әлеуметтік-экономикалық дамуына оң серпін беріп, инфрақұрылымдық тәуекелдерді азайтуға септігін тигізеді.
