Қала әкімдігінің мәліметінше, бұл зауыт 2018 жылы құрылып, 2021 жылдан бастап толық қуатта жұмыс істей бастаған. 2023 жылы кәсіпорын толықтай жаңғыртудан өткізіліп, қазіргі таңда айына 1000–1500 тонна, жылына 13–15 мың тонна арматура өнімін өндіруде. Қазір онда өндірілген өнімдер Алматы, Тараз, Шымкент және еліміздің өзге де қалаларына жеткізіліп, құрылыс саласына сапалы материал ретінде ұсынылып отыр. Зауыт өнімдері Қазақстан Республикасының сапа стандарттарына толық сәйкес келеді. Бүгінде кәсіпорында 70-ке жуық жергілікті тұрғын тұрақты жұмыспен қамтылған.
Зауыттың қазіргі тыныс-тіршілігімен таныстырған кәсіпорын басшысы қала әкіміне алдағы уақытта өндірістік қуатты жылына 50 мың тоннаға дейін арттыру жоспары бар екенін айтты. Сондай-ақ, ол бұрыштама металл өндіретін жаңа қосымша цех ашу көзделіп отырғанын да жеткізді. Бұл ұсынысты орынды деп есептеген Ернат Дүйсенбекұлы зауыт жұмысына жоғары баға беріп, қолдау танытатуға уәде етті.
– Осындай өндіріс ошақтарының дамуы қаламыздың ғана емес, тұтас аймақтың әлеуметтік-экономикалық әлеуетінің артуына үлес қосады. Жергілікті тұрғындардың жұмыспен қамтылуы мен отандық өнімнің өркендеуі — біздің басты мақсаттарымыздың бірі. Бұл нақты іспен дәлелденіп отырған жарқын мысал, – деді шаһар басшысы.
Айдын КӘЛІМХАН
