Жиналған спорт сүйер қауым алдында жеке-жеке сөз алған өңірдің бас имамы Керімбек Сәрсембайұлы мен облыстық дін істері басқармасының басшысы Сағыныш Асқарұлы сайысқа түсетін қара күш иелеріне сәттілік тілеп, ізгі тілектерін жеткізді.
– Бүгінгі жарыстың басты мақсаты – дін саласындағы азаматтардың салауатты өмір салтын ұстануын кеңінен насихаттап, бұқаралық спортты дамытуды дәріптеу. Спорт – денсаулық кепілі. Сол үшін аймағымыздағы мешіттерде, діни мерекелер кезінде мұндай спорттық шаралар жиі ұйымдастырылып тұрады. Жарыс болған соң, топты жарып суырылып шығатын үздіктердің, мүлт жіберіп өкінетіндердің болары анық. Барлықтарыңызға жеңіс тілейміз! – деді бас имам.
Ұйымдастырушылардың сөзінше, бұл жолғы белдесуге Жетісу облысы аумағындағы мешіттерде қызмет атқарып жүрген 22 имам қатысқан. Әр үміткер жарысқа барын салып, өзінің қара күш иесі екенін көрсете білген.
Сонымен, тартымды да тартысты өтіп, көптің көңілінен шыққан дүбірлі белдесуде Алакөл ауданы, Қайнар ауылдық мешітінің бас имамы Мадияр Төлеуханұлы өз қарсыластарының бәрінен басым түсіп, І орын жүлдесін жеңіп алса, ІІ орын бәйгесін Талдықорған қаласындағы облыстық «Иман» мешітінің ұстазы Еділ Ершатұлы еншіледі. Ал ІІІ орынға Алакөл ауданы, Қайнар ауылдық мешітінің имамы Еркебұлан Абіқаев табан тіреді. Сонымен қатар, бірқатар мешіт қызметкерлері ынталандыруға лайық деп танылды. Жеңімпаздар арнайы ақшалай сыйақылармен марапатталды.
Айдын КӘЛІМХАН
