Талдықорғанның Қала күніне орай ұйымдастырылған каратэ турнирінің ашылу маусымына аймақтағы Ескелді, Талғар, Кербұлақ, аудандары мен Талдықорған қаласынан жалпы 140-қа жуық жас спортшы қатысты.
Жарыстың ашылу салтанатында сөз алған қалалық спорт бөлімінің басшысы Жаннұр Әбішев жалпы жиналған жұртты келе жатқан қала күнімен құттықтап, қатысушыларға сәттілік тіледі. Сондай-ақ ол мұндай іс-шаралардың жастарды спортқа баулуда маңызы зор әрі салауатты өмір салтын ұстануда орны ерекше екенін баса дәріптеді.
Жауаптылардың сөзінше, бүгінде Жетісу облысының орталығында спортты дамытуға баса көңіл бөлініп, арнайы спорт нысандар мен жаттығу алаңдары салынуда. Сонымен бірге жылдық жоспарға сай көптеген спорттық шаралар қолға алынып, болашақта аймақ жастарының әлемдік жарыстарда ел намысын абыроймен қорғап, жетістіктерге жетуіне негіз қалануда.
– Каратэдан өткен бұл турнир жас спортшылардың шеберлігін шыңдайтын, достық пен тәртіпке тәрбиелейтін маңызды алаң. Шинкиокушинкай тек күрес өнері ғана емес, ол мінез, ерік, рух жолы. Қала күніне орай осындай ірі спорттық шараның ұйымдастырылуы біздің ұрпаққа деген сенім мен қамқорлықтың көрінісі», – деді сала басшысы.
Аталған чемпионат бірнеше кезең бойынша өтіп, қатысушылар жас ерекшеліктері мен салмақ дәрежесіне қарай сынға түсті. Жарыс соңында жеңімпаздар медаль және арнайы диплом, кубоктармен марапатталды.
Айдын КӘЛІМХАН
