«Спорт – денсаулық кепілі» атты іс-шараның басты мақсаты – жарымжан азаматтардың спортқа деген қызығушылығын арттырып, салауатты өмір салтын насихаттау. Аталған іс-шара «Бірлік пен жігер» атты шерумен басталды. Шеру қаладағы орталық саябақтан басталып, «Ардагерлер саябағына» дейін жалғасты. Шерушілер қатарында қала тұрғындары, әртүрлі халықаралық жарыстардың жүлдегерлері және спорт сүйер қауым болды.
400-ге жуық спортшы мен жанкүйер қатысқан салтанатты шарада сөз алған Талдықорған қаласы әкімінің орынбасары Жеңіс Андабеков жарысқа қатысушыларға сәттілік тілеп, ақжарма тілегін жеткізді.
– Мұндай спорттық бастамалар тек жарыс қана емес, бұл – ерік-жігер мен өмірге деген құлшыныстың мерекесі. Қазір біз ерекше жандардың қайсарлығы мен рухты додасына куә болып отырмыз. Ерекше жандардың мұндай белсенділігін әрдайым қолдап, олардың қоғам өміріне толыққанды араласуына жағдай жасауға тырысамыз, – деді Жеңіс Саятбекұлы.
Тартымды да тартысты өткен жарыс көпшілікке көтеріңкі көңіл күй сыйлады. Шара соңында жеңімпаздар мен жүлдегерлер арнайы медальдар және бағалы сыйлықтармен марапатталды.
Айдын КӘЛІМХАН
