Талдықорған қаласында Назарбаев көшесінің аяғы, яғни айналма жол тұсына жаңа бағдаршам орнатылды. Бұл жаяу жүргіншілер мен көлік жүргізушілері үшін оңтайлы шешім болды.
Аталған аумақты қала тұрғындары «Мебельный» деп атайды. Себебі бұл жерде адам мен көлік ағыны өте көп. Атап айтқанда, Алматы мен Үштөбе бағытындағы негізгі жол, Жоғары медициналық колледж, Жетісу университеті, мектептер мен балабақшалар осы маңда шоғырланған. Соның салдарынан таңғы, түскі және кешкі уақыттарда жол кептелісі жиі болатын.
Бұған дейін таңертеңгі уақытта тәртіп сақшылары көлік қозғалысын қолмен реттеп отыратын. Ал қазір бағдаршам іске қосылғаннан кейін кептеліс азайып, жолдағы қауіпсіздік деңгейі де артты.
Айта кетейік, бұған дейін Жансүгіров көшесінде де бағдаршам орнатылған болатын. Ол жол-көлік оқиғасы орын алып, бірнеше адам зардап шеккеннен кейін қойылған еді.
Қала әкімдігі тарапынан жүзеге асып жатқан мұндай шаралар облыс орталығын жайлы әрі қауіпсіз шаһарға айналдыруға, сондай-ақ тұрғындардың тұрмыс сапасын жақсартуға бағытталған.
Мәулен Әнербай
