Талдықорған мен оған жақын аудандарда қарақұрт өрмекшілері көбейіп, бірнеше адамды шаққан. Бұл туралы turkystan.kz хабарлады.
Әлеуметтік желілерде тұрғындар қарақұрттардың көбейгені туралы фотосуреттер мен видеолар жариялап, алаңдаушылық білдіруде. Пайдаланушылар улы өрмекшілердің жеке үйлердің ауласында, бақтар мен гүлзарларда пайда болғанын жазып жатыр.
Жетісу облыстық денсаулық сақтау басқармасының мәліметінше, биыл қарақұрт шағудың үшінші оқиғасы тіркеліп отыр. Соңғы жағдай – 41 жастағы Талдықорған тұрғынына қатысты.
— 1984 жылы туған азамат 7 маусым күні қарақұрт шағуы күдігімен Талдықорған қалалық көпбейінді ауруханасына жеткізілді. Толық тексеруден кейін оған арнайы сарысу егілді. Қазіргі уақытта науқас жансақтау бөлімінде, жағдайы тұрақты, — деп хабарлады ведомствоның баспасөз қызметі.
Басқарма өкілдерінің айтуынша, өңірдегі барлық медициналық ұйымдар қарақұрт уына қарсы қажетті дәрі-дәрмектермен толық қамтамасыз етілген. Бұл – зардап шеккендерге уақытылы көмек көрсетуге мүмкіндік береді.
