БҰҰ Бас Ассамблеясы 1990 жылы 14-ші желтоқсанда 1-ші қазанды Халықаралық қарттар күні деп жариялаған болатын. Міне, содан бері елімізде әр жыл сайын бұл мереке айрықша аталып өтіліп келеді. Осыған байланысты Талдықорғанда Қарттар күніне арналған арнайы концерт өтті.
Мерекелік шараны Талдықорған қаласындағы белсенді ұзақ өмір сүру орталығы ұйымдастырған. Бағдарлама аясында Д. Рақышев атындағы Жетісу облыстық филармониясының өнерпаздары оркестрдің сүйемелдеуімен жанды дауыста әсем әндер шырқап, өңір қарттарына құрмет білдірді.
Бүгінде Талдықорған қаласында белсенді ұзақ өмір сүру орталығы жұмыс жасауда. Заман талабына сай жабықталған бұл орталықта тәжірибелі мамандар қызмет істейді. Орталықтың негізгі мақсаты – зейнет жасындағы адамдарды әлеуметтендіру, оларды белсенді мәдени-шығармашылық, спорттық және іскерлік өмірге тарту, олардың физикалық және психологиялық саулығына ықпал ету арқылы өмір сүру ұзақтығын арттыру.
Мамандардың мәліметінше, бүгінде жалпы Жетісу облысы бойынша 95 мыңға жуық зейнеткер бар. Олардың 27 мыңнан астамы Талдықорған қаласында тұрады. Олар негізі жоғары, төмен, орта буын өкілдерінен құралған. Алдыңғы буын санатына жыл санап қатары сиреп бара жатқан егде жастағы соғыс және тыл ардагерлері енсе, зейнеткерлік жасқа енді толғандар орта, қызмет саласына қарай ертерек демалысқа шыққандар төменгі буын өкілдері болып саналады. Осыған байланысты ардагерлер ұйымының қалалық филиалы олардың мұң-мұқтажы мен әлеуметтік мәселелерін шешу үшін шаһар әкімдігі және басқа да саладағы демеушілермен тығыз байланыс орнатқан. «Ауылыңда қартың болса, жазып қойған хатпен тең» деген. Бұл даналықтың алтын бастауы болған ата-бабаларымыздың ұлағатты да тәрбиелі жолын жалғап келе жатқан қазіргі ақсақалды аталар мен ақ жаулықты әжелер. Олар өз кезегінде елдің ертеңі үшін ерінбей еңбек етіп, ел құрметіне бөленгендер. Қазіргі әрбір қарт еліміз Тәуелсіздік алған кезеңде қоғамның дамуы мен тоқырау жылдары тұралап қалған өңірді өркендетуге өлшеусіз үлес қосқандар.
Көптің көңілінен шыққан рухани шара соңында қариялар өңір өнерпаздарына алғыс айтып, ақ батасын берді.
Айдын КӘЛІМХАН
