Талдықорған қаласындағы қонақүйлердің бірінде орын алған өрт оқиғасынан кейін әйел адамның денесі табылды. Құқық қорғау органдарының мәліметінше, марқұмның денесінде зорлық-зомбылық белгілері анықталған. Қазіргі таңда «Адам өлтіру» бабы бойынша қылмыстық іс қозғалды.
Жетісу облысының төтенше жағдайлар департаменті таратқан мәліметке сәйкес, 24 мамыр күні таңғы сағат 4:14 шамасында Paradise Villa қонақүйінің бірінші қабатында өрт шыққан. Жалын 20 шаршы метр аумақты шарпыған. Құтқарушылар өртті 15 минут ішінде сөндіріп, ғимараттан 35 адамды қауіпсіз жерге көшірген.
Алайда ғимаратты тексеру барысында құтқарушылар қонақүй администраторының мәйітін тапты. Кейін анықталғандай, әйел адамның денесінде 12 пышақ жарақаты болған.
Жетісу облыстық полиция департаменті аталған дерек бойынша ҚР ҚК 99-бабы («Адам өлтіру») бойынша іс қозғағанын мәлімдеді. Күдікті ретінде 23 жастағы жергілікті тұрғын ұсталды. Қазіргі таңда ол уақытша ұстау изоляторында, тергеу амалдары жүргізілуде.
Тергеу нұсқасы бойынша, күдікті қылмыстың ізін жасыру үшін қонақүйдің қабылдау бөлмесіне қасақана өрт қойған болуы мүмкін. Құқық қорғау органдары оқиғаның барлық мән-жайын анықтап жатыр. Тергеу мүддесіне байланысты өзге ақпарат әзірге жарияланбайды.
Дереккөз: Stan.kz
