Салаға басшыларының сөзінше, қазір жыл санап қала аумағындағы су құбырлары мен жарық желілері тегіс жаңартылып, табиғи газ тарту жұмыстары жалғасып, жолдар салынуда. Сонымен бірге ескі көпқабатты тұрғын үйлердің шатыр жабындылары мен қасбеттері жөнделіп, тарихи ескерткіштердің айналасы тегіс абаттандырылуда. Бүгінде шаһар аумағында 126 гектарды құрайтын 5 саябақ, 40 сквер бар. Соның ішінде «Жеңіс» және орталық саябақтарында абаттандыру жұмыстары жүргізілуде. Тамыз айында қолға алынған бұл жұмыстар аяқталуға жақын.
Нақты деректерге жүгінсек, соңғы 10 жылдан астам уақыт ішінде Талдықорған қаласындағы 300-ге жуық көпқабатты тұрғын үйге қарасты 200-ге жуық аула абаттандырылған. Осыған байланысты бұл жұмыстар әлі күнге жалғасып биыл жыл соңына дейін тағы бірқатар жаңа аула пайдалануға берілмек.
Талдықорған қаласы әкімдігінің мәліметінше, «Жеңіс» саябағының аркасы заманауи талаптарға сай жаңғыртылса, орталық саябақтың Қабанбай батыр көшесі жағындағы кіреберісіне жаңа арка орнату жұмыстары жүргізілуде. Сонымен бірге аймақта «Таза Қазақстан» экологиялық акциясы басты күн тәртібінде. Соның аясында жолдар ретке келтіріліп, жол белгілері жаңартылып, саябақтар мен көше бойындағы орындықтарды бояу және гүл егу жұмыстары жүргізілуде. Бұл абаттандырылулар алдағы уақытта қала көркін аша түсіп, өңір тұрғындарына көтеріңкі көңіл күй сыйламақ.
Айдын КӘЛІМХАН
