Жауаптылардың сөзінше, осымен 16-шы мәрте ұйымдастылып отырған бұл байқауға өңірдегі 30-дан астам бойжеткен қатысуға ниет білдіріп, 15 ару ақтық сынға жолдама алған. Алдын ала іріктеу кезеңдерінен сүрінбей өткен сұлулар, финалдық сында өз өнерлерін ортаға салды. Байқауға арнайы келіп, әділқазылар құрамында болған «MISS KAZAKHSTAN – 2025» сұлулық байқауының PR-директоры Құралай Құрман үміткерлерге шабыт беріп, сәттілік тіледі.
Талдықорған аруы атанып, сұлулық тәжін тағу әр қатысушының арманы. Қыздар алдымен өздерін таныстыру, одан соң келісті келбеті, сән сымбаты сынды 4 кезең бойынша сынға түсті. Ақылына көркі сай аруларды іріктеу оңайға соқпаған белгілі. Сонымен әділқазылар алқасының шешімімен аймақтың 17 жастағы ай маңдай аруы Алина Нұрахметова бас жүлдеге лайық деп танылып, жеңімпаз атанды.
Байқау қорытындысында сөз алған Талдықорған қаласы әкімінің орынбасары Жеңіс Андабеков барлық қатысушылар мен демеушілерге алғыс білдіріп, жүлдегерлерді марапаттады. Жеңімпаздар қаржылай сыйақыға ие болып, бас жүлде иегері Алина Нұрахметова 500 мың теңгені еншіледі. Енді ол алдағы уақытта өтетін республикалық «MISS KAZAKHSTAN – 2025» сұлулық байқауында Жетісудың намысын қорғамақ.
Айдын КӘЛІМХАН
