Қала әкімдігінің баспасөз қызметінің мәліметінше, бүгінде Талдықорған қаласында 800-ден астам көпқабатты тұрғын үй бар. Олардың басым бөлігі 1970-1980 жылдары салынған. Қазіргі уақытта көптеген үйлердің шатыр жабындысы мен қасбеті әбден тозып, жаңартуға тура келген. Осыған байланысты соңғы 10 жыл ішінде қаладағы 300-ден астам көпқабатты тұрғын үйге қарасты 200-ге жуық аула абаттандырылған. Мұндай жұмыстар алдын ала жоспарға алынып, жыл сайын жалғасын тауып келеді. Мәселен, биылғы жылдың соңына дейін тағы 12 жаңа аула пайдалануға берілмек.
– Қала әкімінің тапсырмасына сәйкес, тозығы жеткен тұрғын үйлерді күрделі жөндеу жұмыстары жыл сайын жалғасуда. Бұл тұрғындардың қауіпсіздігін қамтамасыз етіп, өмір сүру сапасын арттыру және қала келбетін жақсарту мақсатында жүзеге асырылуда. Мысалға, өткен жылы 28 үйдің шатыры жаңартылып, 11 үйдің қасбеті ретке келтірілген болатын. Сонымен қатар, көпқабатты үйлердің аулалары да кезең-кезеңімен абаттандырылып, заман талабына сай жөнделуде,– дейді сала жауаптылары.
Ал өңір тұрғындарының айтуынша, жыл санап Талдықорған қаласының аумағы кеңейіп, көптеген шағын аудандар бой көтерген. Аймақта жолдар жаңартылып, жарық, су және табиғи газ желілері тартылуда. Сонымен бірге тұрғын үй ғимараттары, мектеп, балабақша, емхана сынды әлеуметтік нысандар мен спорттық алаңдар салынып қала құрылысы тегіс жаңартылуда. Міне, бұл жан-жақты дамудың жарқын көрнісі.
Айдын КӘЛІМХАН
