Жетісу облысы соңғы жылдары аймақ экономикасын әртараптандыру мен импортты алмастыру бағытында жүйелі қадамдар жасап келеді. «Жетісуда жасалған» бренді осының нақты нәтижесіне айналып, жергілікті кәсіпорындардың өнімдері ішкі нарықта берік орын алуда.
«Жетісуда жасалған» атауымен «Атамекен» өңірлік кәсіпкерлер палатасы қалалық әкімдікпен бірлесіп ұйымдастырған жергілікті өндірушілер жәрмеңкесі өтті. Оған 40-тан аса кәсіпкер қатысып, өз өнімдерін ұсынды. Іс-шара облыстағы барлық аудан, қаладағы бизнес өкілдерін жинап, сапа мен өзіндік ерекшелікті бағалайтындар үшін нағыз мерекеге айналды.
Ол алғаш рет жобаның барлық қатысушысын бір алаңның астына біріктіріп, бірліктің символына айналды. Жәрмеңке қонақтары табиғи азық-түлік, қолдан жасалған бұйымдар, тоқыма және жетісулық тұрғындар байлығы мен еңбексүйгіштігін көрсететін басқа да тауарлармен танысты.
– «Бір ауыл – бір өнім» жобасы аясындағы көрмелер жыл сайын облыстық кәсіпкерлер палатасында өтеді. Ал қазіргі жәрмеңке ерекше болды. Жәрмеңке біздің жеріміздің қаншалықты бай әрі талантты адамдардың көп екенін аңғартты. Бұл жерге өз ісін жанын сала атқарып, аймақты танымал ететін адамдар жиналды. Біз мұны көргенімізге қуаныштымыз. Кәсіпкерлер де көбейіп келеді. Олар бір-бірімен тәжірибе алмасып, өзгелерге шабыт сыйлайды. Мұндай бастамаларды қолдау – біздің Жетісуды дамытуға қосқан ортақ үлесіміз, – дейді облыстық кәсіпкерлер палатасының директоры Дәурен Оңалбаев.
Жәрмеңкеге келушілер кәсіпкерлермен тікелей сөйлесуге, олардың өнімдерінің ерекшеліктері туралы білуге және тиімді ұсыныстар алуға мүмкіндік алды. «Жетісуда жасалған» жәрмеңкесі аймақтағы белсенді, талантты және бастамашыл кәсіпкерлердің саны артып келе жатқанын байқатты. Олардың идеялары мақтаныш пен сенімге лайық өнімдерде көрініс тапты.
Айгүл БАЙБОСЫНОВА
