Бұл жолғы аралау барысында алдымен Шевченко–Құрманов көшелеріне ат басын тіреген Ернат Дүйсенбекұлы ондағы жер қазу жұмыстарынан кейін асфальттың дұрыс қалпына келтірілмегенін көріп, оны атқарған мердігер мекеменің жұмысын сынға алды. Себебі биыл аталған аумақтарда сумен жабдықтау және су бұру желілерінің құрылысы жобасы аясында «Диас Проект» ЖШС мердігер ұйымы құбыр төсеу жұмыстарын жүргізген болатын. Алайда аталған кәсіпорын өз міндетін толық атқармағандықтан, осындай олқылықтарға жол берілген. Осыған байланысты қала әкімі оларға қатаң ескерту жасап, жіберілген кемшіліктерді тез арада жоюды тапсырды.
– Халықтың күнделікті жүретін жолы – бұл бірінші кезектегі басты мәселе. Өйткені қаланың әрбір тұрғыны сапалы жолмен жүруге құқылы. Мен сіздерге өз жауапкершіліктеріңізді сезініп, бір апта ішінде бүлінген көше жолдарын толық қалпына келтіруді тапсырамын. Бұл жерде жұмыстың сапасымен қатар, уақыт та маңызды, – деді шаһар басшысы.
Осыдан соң қала әкімі орташа жөндеу жұмыстары жүргізіліп жатқан Қабанбай батыр және Рүстембеков көшелеріне барып, ондағы жұмыс барысымен танысты. Онда да ол құрылыстың өте баяу жүріп жатқанын ескертіп, мерзімнің тым созылып кетпеуі керектігін айтты.
Қала тұрғындарының айтуынша, бүгінде Талдықорған қаласы бойынша жол жөндеу, халықты табиғи газбен қамту, сондай-ақ су және жарық желілерін жүргізу жұмыстары кезең-кезеңімен жүзеге асырылуда. Бұл – көптің көңілінен шыққан құптарлық бастама. Дейтұрғанмен әкім ескерткендей, газ және басқа да құбыр жүргізуші құрылысшылардың салғырттығынан кейбір көшелерде қазылған жер дұрыс жабылмай қалуда. Кейін шала жабылған жолдар ойылып, қаладағы көлік қозғалысын қиындатып, жұртты әбігерге салатыны анық.
Айдын КӘЛІМХАН
