Сала мамандарының сөзінше, өткен жылы Талдықорған қаласы бойынша 54 шақырымға жуық жолға жөндеу жұмыстары жүргізілсе, онда негізінен Жастар-1, Солтүстік-Батыс және 8,9 шағын аудандардың көше жолдары қамтылған. Ал жөнделген жолдардың 29 шақырымға жуығы жаңадан салынатын жол болса, 14,6 шақырымы күрделі жөндеуден өткізілуге тиісті жолдар. Биылғы жылы облыс орталығындағы 70 шақырымнан аса жол ретке келтірілмек. Соның ішінде қаладағы «Шығыс» шағын ауданын қамту көзделген. Өйткені, аталған аумақ тұрғындарын көптен бері мазалап келген жол мәселесі оң шешімін тауып, қолға алынған жол жөндеу жұмыстары жақында толық аяқталмақ.
– Талдықорған қалсындағы «Шығыс» шағын ауданында қазір 3,6 шақырым болатын 5 көшеде орташа, 10 шақырымнан асатын 7 көшеде күрделі жөндеу жұмыстары қарқынды жүргізілуде. Бұған қоса, аталған шағын аудандағы Салтанат көшесі мен Жансүгіровтен Айдарлы көшесіне дейінгі аумақтарда жаяу жүргінші жолы да салынуда. Бұл жұмыстар тамыз айында аяқталады деп жоспарлануда,– деді қала әкімінің баспасөз хатшысы Олжас Құрмашев.
Аймақ тұрғындарының айтуынша, жергілікті жұрт өткен жылғы Талдықорған қаласы әкімімен кездесуінде жолды жөндеп беру туралы өз өтініштерін жеткізген. Себебі, бұл мәселе көптен бері шешімін таппай көктем-күз айларында су басқан батпақ жол жаяу жүргіншілерді де көлік жүргізушілерінде әбден әуреге салып келген. Қазір аталған шағын аудандағы көшелерге жолы салынып, аумағы тегіс ретке кетіріліле бастаған.
Айдын КӘЛІМХАН
