Алматы облысында бір айдан астам уақыт бұрын жоғалып кеткен жас әйелді іздеу жұмыстары әлі де жалғасып жатыр. Жоғалған жан туралы бағытты LIDER.KZ еріктілері өздерінің Instagram парақшасында жариялады, – деп хабарлайды 7-su.kz ақпараттық порталы.
1993 жылы туған Әсел Бақытғалиқызы Тахирова 2025 жылдың 2 желтоқсанында жоғалып кеткен. Сол күні сағат 15:00 шамасында ол Талғар ауданы, Тұздыбастау ауылы, Исатай батыр көшесі, 3-үй мекенжайында орналасқан «Большая семья» мейірбикелік күтім үйінен шығып кетіп, қайтып оралмаған.
Іздеудегі әйелдің сырт келбеті мен ерекше белгілеріне назар аударуларыңызды сұраймыз:
-
Бойы: 160-165 сантиметр;
-
Дене бітімі: орташа;
-
Шашы: қара, ұзын;
-
Ерекше белгілері: көзге көрінетін қылилығы бар, қолдарында кесілген жарақаттардан қалған тыртықтар бар, бел тұсында иероглиф түріндегі татуировкасы бар.
Жоғалған күні Әсел қызыл бөрік, қара ұзын күрте, көгілдір джинсы және жасыл етік киген.
Еріктілердің мәліметінше, жас әйелдің психологиялық денсаулығында кінәрат бар және ол айналаға бейімделе алмайтын (дезориентация) күйде болуы мүмкін. Мұндай жағдайда адам өзінің қайда жүргенін және кім екенін түсінбейді.
Қазіргі уақытта облыс аумағында іздестіру шаралары жүргізіліп жатыр. Егер сізде Әсел Тахированың жүрген жері туралы қандай да бір ақпарат болса немесе оған ұқсайтын адамды көрсеңіз, дереу полицияға немесе еріктілердің жедел желісіне хабарласуыңызды өтінеміз. Әрбір мәлімет маңызды болуы мүмкін. Осы ақпаратты барынша бөлісіп, жас келіншектің тезірек табылуына үлес қосайық!
