Қазақтың қалам ұстаған азаматы әрі сырлы сөз бен нұрлы жырды серік еткен ақын ретінде айтар дүнием айшықты. Өз дауысымды беріп, саялы Сарқан қаласындағы сайлау учаскесінен өз таңдауымды жасадым. Бұл – азаматтық парызым.
Елді елең еткізген дүние АЭС салу мәселесі болғаны көпшілікке анық дүние. Президент Қасым-Жомарт Тоқаев өз Жолдауында жалпыхалықтық референдум өтетінін хабарлады. Содан бері науқанға дайындық қызу жүрді. БАҚ саласы болсын, басқа да ақпарат көздері болсын жаппай Атом электр стансысы, оның пайдасы мен артықшылығы туралы хабар таратты.
Қалам ұстаған журналист болған соң кез келген дүниені терең зерттеуге жасымыздан дағдыланғанбыз. Бұл – өмірлік әдет. Әрбір дүниенің күнгейі мен көлеңкесін, пайдасы мен залалын зердеден өткіземіз. Ақпарат тасқындаған уақытта әлем елдерінің озық тәжірибесі мен атақты ғалымдардың еңбегімен ұштасқан ақпараттарды, зерттеу мақалаларды оқыдық. Кейбір ғалымдардың Атом электр стансысы туралы ғылыми жазбаларымен таныстық. Артықшылығына мән бердік. Залалын да зейінмен салмақтадық.
Рас, бүгінгі таңда ақпарат ашық, кез келген мәселенің мазмұнды-мәйекті түсіндірмесі бар. Зерделеген жандардың бәрі де өз шешімін қиналмай шығара алады. Бұл орайда мен де өз шешімімді референдум арқылы таныттым, даусымды бердім. Ендеше, елдің болашағы айқындалар осынау күні ең басты дүние – халықтың белсенділігі дер едім.
Жомарт ИГІМАН,
Қазақстан Жазушылар және Журналистер одағаның мүшесі,
ақын
