Жетісудың көкпаршылары дүбірлі додадан олжалы оралды. V Дүниежүзілік көшпенділер ойындарында ұлттық құрама сапында ел намысын қорғаған Нұржан Сылатай мен Мәді Сейдулла Жетісу жұртының мерейін үстем етті.
Жетісу облысы әкімінің орынбасары Диас Есдәулетов қос спортшыны қабылдап, жеңісімен құттықтады. Көкбөрүден күміс жүлдеге ие болған Нұржан Сылатай мен Мәді Сейдулла Қазақстан Республикасы Президентінің Алғыс хатымен және ақшалай сыйлықпен марапатталды. Ал олардың бапкері Бауыржан Мұғыжаровқа облыс әкімінің Алғыс хаты табысталды.
Кездесуде Ұлттық спорт түрлерінен «Жетісу» кәсіпқой спорт клубының басшысы Рүстем Досжанов жеңістің артында жүйелі дайындық пен ел-жұрттың қолдауы тұрғанын атап өтті.
– Көшпенділер ойынында жақсы нәтиже көрсеттік. Бұл – облыс басшылығы мен спорт басқармасының қолдауы, спортшылардың маңдай тері мен тынымсыз дайындығының жемісі. Сол үшін ерекше алғыс айтамыз. Алда талай биікті бағындыруды көздейміз. Бұйырса, келер жылы Қазақстан чемпионы атануға талпынамыз, – дейді Рүстем Әмірғазыұлы.
Сондай-ақ жиында сөз алған облыс әкімінің орынбасары Диас Есдәулетов спортшыларды құттықтап:
– Ұлттық спорт – халқымыздың рухын айшықтайтын асыл мұра. Көкпардан халықаралық додада ел намысын абыроймен қорғап, жүлде қоржынына олжа салған жерлестерімізге алғыс айтамыз. Жетісудың көкпаршыларының жеңісі – тынымсыз еңбектің, табанды дайындықтың нәтижесі. Алдағы жарыстарда да толағай табыс тілеймін. Тақымдарыңыз талмай, Жетісудың Көк туын биіктете беріңіздер, – деді Диас Рахметұлы.
Дала додасында дараланған көкпаршылардың бұл жеңісі Жетісудағы ұлттық ат спортының тынысын танытып, кейінгі буынға жігер берер жетістік болды.
