Елімізде экологиялық мәдениетті қалыптастыру мен қоршаған ортаны қорғау бағытында қолға алынған «Таза бейсенбі» акциясы кеңінен қолдау тауып келеді. Мемлекет басшысының бастамасымен жүзеге асып жатқан «Таза Қазақстан» жалпыұлттық жобасы аясында әр апта сайын өткізілетін бұл шара өңірдің түкпір-түкпірінде мыңдаған азаматтарды ортақ іске жұмылдыруда.
Жетісу облысында бұл игі бастамаға «AMANAT» партиясының белсенділері мен жақтастары белсенді түрде қатысып келеді. Бүгінге дейін өңірде 33 мыңнан астам адам акцияға атсалысып, 48 мың тоннаға жуық қоқыс жиналды. Іс-шара барысында өзен-көл жағалаулары, өндірістік аймақтар, жол бойлары, қоғамдық орындар мен демалыс алаңдары тазартылды.
Өткен аптада Сарқан қаласында «Жоңғар Алатауы» мемлекеттік ұлттық табиғи паркінің көше жиегінде абаттандыру жұмыстары жүргізіліп, аумақ тұрмыстық қалдықтан тазартылды. Ал Ескелді ауданының Қарабұлақ ауылында балалар ойын алаңдарының маңынан 2 тонна қоқыс жиналып, арнайы полигонға жеткізілді.
Сарқан аудандық партия филиалының төрағасы Жалел Құдияров бұл бастаманың маңыздылығына тоқталып:
«Таза бейсенбі» акциясы – табиғатты қорғауға бағытталған бір реттік шара ғана емес, бұл – қоғамда экологиялық сананы қалыптастырудың нақты тетігі. Біздің тұрғындар белсенділік танытып, туған жердің тазалығына үлес қосуда. Мұндай игі істер арқылы жастарымызды еңбекке баулимыз, үлкендерімізге үлгі көрсетеміз. Бұл – ортақ жауапкершілік», – деді.
Ұйымдастырушылардың айтуынша, мұндай шаралар тек тазалықпен шектелмейді. Олар балаларды еңбекке баулып, қоршаған ортаға деген қамқорлықты, туған жерге жауапкершілікпен қарау дағдысын қалыптастыруға сеп болады. Мәселен, Текелі қаласында партия мүшелері №3 орта мектеп аумағын ретке келтіріп, оқушылар үшін жағымды орта қалыптастыруға өз үлестерін қосты.
Айта кетейік, өткен жылдың 6 маусымынан бері «AMANAT» партиясының мүшелері мен мыңдаған еріктілері әр бейсенбі сайын қалалар мен ауылдарда, саябақтар мен скверлерде, ескерткіштер мен су айдындары маңында тазалық жұмыстарын тұрақты түрде жүргізіп келеді.
«Жетісу-Ақпарат»
