Қазақстанның жылжымайтын мүлік нарығында маңызды құжаттық өзгерістер орын алды. Енді елімізде «техникалық паспорт» ұғымы заңнамалық деңгейде қолданыстан шығарылып, оның орнына жаңа үлгідегі құжат енгізілді, – деп хабарлайды 7-su.kz ақпараттық порталы Tengrinews.kz сайтына сілтеме жасап.
Әділет министрлігі Регистрациялық қызмет және заңдық қызметтерді ұйымдастыру комитетінің мәліметінше, мемлекеттік қызметтерді цифрландыру аясында бұрынғы техникалық паспорттың орнын енді «жылжымайтын мүлік нысанының кадастрлық паспорты» басты. Жаңа құжат нысанның техникалық және сәйкестендіру сипаттамаларын ғана емес, сонымен қатар жер учаскесі туралы мәліметтерді де қамтиды.
Тұрғындар арасында «құжатты шұғыл түрде қайта рәсімдеу керек, әйтпесе үйді сату мүмкін болмайды» деген қауесет тарағанымен, министрлік бұл ақпараттың шындыққа жанаспайтынын мәлімдеді. Ведомство мамандарының түсіндіруінше, қолданыстағы техникалық паспорттар өз күшін жоймайды және оларды жаппай ауыстыру міндетті емес. Тіпті үйдің иесі ауысқан жағдайда да кадастрлық паспортты қайта рәсімдеу талап етілмейді, өйткені ескі құжат нысанның негізгі сипаттамаларын заңды түрде растап тұр.
Жаңа кадастрлық паспорт тек нақты жағдайларда ғана рәсімделеді. Мысалы, нысанда қайта жоспарлау (перепланировка), реконструкция немесе қайта жабдықтау жұмыстары жүргізіліп, техникалық сипаттамалары өзгерген кезде жаңа құжат алу қажет. Сондай-ақ меншік иесі өз еркімен деректерді нақтылағысы немесе жаңартқысы келсе, құжатты ауыстыруға өтініш бере алады.
2026 жылғы қаңтардан бастап Әділет министрінің бұйрығымен бұл қызметтерді көрсету қағидалары одан әрі жетілдіріліп, «электрондық үкімет» порталы арқылы алу мүмкіндігі кеңейтілді. Мамандардың айтуынша, егер сіздің баспанаңызда ешқандай техникалық өзгеріс болмаса, ескі техпаспортты сақтай беруіңізге болады. Бұл реформа құжат айналымын жеңілдетіп, жер мен ғимарат мәліметтерін бір цифрлық жүйеге біріктіруді көздейді.
