Текеліде қала тұрғыны Зухра Сейтжанова өзінің 60 жас мерейтойын ел тағдырымен сабақтас маңызды сәтпен бірге қарсы алды, – деп хабарлайды 7-su.kz ақпараттық порталы.
1966 жылдың 15 наурызында дүниеге келген мерейтой иесі үшін бүгін айтулы күн. Ол туған күнін атап өтумен қатар, референдум учаскесіне арнайы келіп, азаматтық борышын орындап, өз таңдауын жасады.
Референдум учаскесіндегі комиссия мүшелері де ерекше күнді назардан тыс қалдырмады. Олар мерейтой иесін шын жүректен құттықтап, гүл шоқтарын табыстап, ізгі тілектерін білдірді. Ақжарма тілектер легінде туған күн иесіне зор денсаулық, ұзақ ғұмыр, отбасы амандығы мен бақ-береке тілеп, мерейлі жасының қуанышы еселене түсуін тіледі. Мұндай ілтипат пен құрмет сайлау учаскесіндегі мерекелік ахуалды одан сайын аша түсті.
Мерейтой иесі өз кезегінде көрсетілген ықыласқа алғысын білдіріп, референдумға қатысу әрбір азаматтың маңызды міндеті екенін атап өтті. Оның айтуынша, ел болашағына бейжай қарамай, өз таңдауын жасау – әр адамның азаматтық жауапкершілігінің көрінісі. Оқиға желісі көрсеткендей, Зухра Сейтжанова үшін 60 жас мерейтойы тек жеке өміріндегі қуанышты күн ғана емес, елдік мүддемен астасқан мәні терең күн ретінде есте қалды.
