Текелі қаласында Ұлыстың ұлы күні – Наурыз мейрамы кең көлемде аталып өтті, – деп хабарлайды 7-su.kz ақпараттық порталы.
Мерекелік шара Тәуелсіздік алаңында ұйымдастырылып, көпшілік серуен, концерттік бағдарлама және би кешімен жалғасты. Абылай хан және Гагарин көшелерінде 11 қазақ үйден тұратын этноауылдар бой көтерді.
Ұлттық дәстүрімізді насихаттау мақсатында алтыбақан орнатылып, қазақша күрес, арқан тарту, ләңгі тебу, гір көтеру, асық ату, тоғызқұмалақ және қол күрес сынды ұлттық спорт түрлерінен сайыстар өткізілді.
Орталық саябақтағы аттракциондар халық игілігі үшін жұмыс істеп, қазақ үйлерде тұрғындарға арналған «Наурыз көже» ұсынылып, қайырымдылық түскі ас ұйымдастырылды.
Мереке аясында қала тұрғындары мен қонақтарына 35 000 дана бауырсақ, 1500 литр наурызкөже және 500 кг палау таратылды.
